Fury vs Usyk - Zaninah an innuai dawn

Boxing khawvela chanchin ngah bera chhal ngam ni mek Tyson Fury chuan zanin hian ring chhung a rap leh dawn ta a, Oleksandr Usyk nen undisputed heavyweight title kawl turin an innuai dawn - a hmuhnawm ang.

Riyadh, Saudi Arabia-ah boxer pahnih hi an intawng dawn a, an inhnekna tur hmun Kingdom Arena-ah hian mipui 26,000 an leng - inhnek hi DAZN website leh app lamah pay-per-view kaltlanga en theih a ni dawn a, inhnek en man hi Rs 1,850 a ni ang.

Fury leh Usyk bakah hian fight dang pariat a awm dawn bawk a, zan dar 9:30-ah ṭan tur niin, Fury te an inhnek meuh chuan keini lam sanaah chuan zing dar 3:30 vel a nih tawh a rinawm.

Che dangdai

Boxer pahnih hian an inhnek hmain press conference an hmachhawn a, ṭum dang angin Fury a ṭawng pawr duh lo - hetihrual hian Usyk chu hmaichhanah a en duh lo a, lehlam a hawi lui tlat!

Fury chuan, "Hnehna ka lo chan tawh zozai avang khan Pathian hnenah lawmthu ka sawi a, he hun kan thlen theih nana tha thawhtu mipuite chungah lawmthu ka sawi a, min cho avangin Oleksandr Usyk hnenah lawmthu ka sawi bawk," a ti.

Boxer pahnih inhma-chhawnnaah hian dollar maktaduai 150 vel chu tlingkhawm tura beisei a ni a, Fury hian 70% a hlawh dawn avangin dollar maktaduai 100 chuang a hlawh dawn tihna a ni a, Usyk hian $30mtd vel a hlawh dawn thung.

Ka inpeih e

Kum 35 mi Fury chuan, "Sawi tur tam tak ka nei hran lo a, mahse, ka inpeih e. Fight ropui tak hmachhawn turin ka inbuatsaih a, a harsa emaw, a awlsam emaw pawh ni se, ka inpeih ve ve," a ti.

WBC champion Fury chuan sawi zawmin, "Pathianin Usyk malsawm se. Kan pahniha ring chhung aṭanga him dam taka kan chhuah theih nan Usyk pawh ka ṭawngṭaipui ang," a ti - Fury hian WBC title a kawl mek a, Usyk hian WBA (Super), WBO leh IBF a kawl thung.

Boxer pahnih hian an title hi an thap ve ve dawn a, Usyk chuan, "Sawi tur tam tak a awm lo - thawnthu thar ziak ang," a ti - Fury hian vawi 35 fight hmachhawn tawhin, vawi 34 a chak a, vawi khat draw a nei. Usyk hian vawi 21 fight hmachhawn tawhin, a chak vek.