Durtlang North tan beiseina a nung

Ather Pro Volleyball League 2024 khelh laiah Durtlang North chuan semifinal khel turin beiseina an la nei zel. PVL league round match li an khelh tawh chinah point nga hmuin palina dinhmun an luah.

Ningani zan LPS Arena, Falkland-a inkhelah Durtlang North hian an elpui Chhinga Veng Spikers chu 28-26, 27-29, 22-25, 25-20, 15-6 (3-2) in an hneh a, an chak theih nan Johan Vanneihsanga chuan point 32 ngawt a thawk chhuak a ni.

Team pahnih hian knockout round inhlangkai turin chak an mamawh a, inhnehtawk taka set nga an inkhelh hnuah 2022 champion Durtlang North-in point hnih hmuin Chhinga Vengin point khat an neih belh ve thung.

League match khelh khat la awmah Tuichangral leh Hunthar an tlang tawh a, semifinal lut thei hniam ber palinaah Durtlang North insawhnghetin point nga an kawl a, an chung chiaha awm Thutak Nunpuitu Team aiin point khatin an hniam.

Panganaah Spikers inhungin point thum an hmu - May 20, Thawhṭan zanah league khar nan a mawnga awm Hlimen nen an inkhel dawn. A tuk zanah league zawh a ni dawn a, Durtlang North leh Hunthar an inhmachhawn thung ang.

Johan-a'n vawi 32 vaw tlain point 12 a hloh a, a vawi hnih nan Kuriz Player of the Match-a thlan a ni a; ball rang vawtu Thangminlal Guite chuan point 21 hmuin 13 a paih a, inelna nasa tak karah Durtlang North-in set khatna an la.

Thanga'n vaw tlain 27-26-in Durtlang North an sang a, vawi hnih an deuce hnuah an tlang. Set hnihnaah vawi thum an deuce leh a, 27-26-a sang zawk an nih laiin Johan-a'n a vaw kai lo a, Chhinga Vengin an nih nual hnuah Durtlang North-in point hnih an hloh zawn a ni.

Spikers-in state dang aṭanga an lak luh Yougank Baliyan-a'n point 34 hmuin 14 a hloh a, set thumnaah a vanglai hmangin a vaw tla hnem hle a, a hlap tlak hmangin 23-19-in hma an hruai. Durtlang North an bet a, point 20 chiah an hmu ve hman tihin lehlamin set an la zawn.

Set lina aṭangin Durtlang North-in danglamna siam thei player an ngah zawk tih an lantir a, state dang aṭanga an lak luh Shashank Kandpal chuan an inkhelh chhungin vawi 13 a vuak tlak laiin point 10 a hloh a, rin tlak tawk lo mah se Mizo player-ten hriam takin an khel.

Chhinga Vengin Yougank an chhawr rimin an innghat nasa a, a zuan hnem avangin a tla hniam a, a vuak sual bakah an dang fo bawk. Durtlang North tan H. Malsawmsanga'n an inkhelh chhungin point nga a hloh laiin point 19 a hmu a, a vuak tlak hnuah 15-15-in Spikers an nih rual a, an kalsan zui nghal.

Yougank leh Lalchungnunga vuak an dansak zawn hnuah Chhinga Veng talbuaiin 24-20-in Durtlang North an sang a, Sawmsanga'n hlap tlain a vawi hnih nan set an la a, lehlam nih ruala phurna an insiam belh laiin Spikers an zuai.

Set hnuhnung berah Johan-a'n a hlap tla tam a, Thanga'n lehlam vuak dang ve thungin inkhel an thunun hneh hle a, point khat hmuh belha chak turin 14-4-in Durtlang North an sang. Spikers-in point hnih an hmuh zawn ve leh hnuah Sawmsanga'n vaw tlain an chak.