FIFA member thar Kosovo leh Gibraltar

Football khawvela thuneitu sang ber FIFA chuan Kosovo leh Gibraltar chu member ni turin a pawm thar a, heti hian FIFA hnuaiah member 211 an awm tawh tihna a ni.

Kosovo leh Gibraltar hian FIFA member ni turin thlawptu an hmu ṭha hle a, Kosovo hian vote 86% an hmuh laiin Gibraltar chuan vote 93% an hmu thung.

Kum 300 kalta a Britain hnena Gibraltar hlantu Spain chu FIFA member-a Gibraltar awm duh lo langsar an ni a, 2013 khan UEFA member-ah Gibraltar hi pawm an lo ni tawh. Kum 2008-a Serbia aṭanga in dang Kosovo hi Serbia chuan a do nasa hle bawk.

Kosovo FA president Fadil Vokrri chuan, "Kosovo player leh mipuite chuan hun rei tak he hun lo thlen hun hi kan nghak tawh a, min thlawptute chungah kan lawm takzet a ni," tiin a hlim hle.

Kar hmasa lawka UEFA member thar nihna nei Kosovo rama piang player langsar zingah Xherdan Shaqiri leh Valon Behrami (Switzerland), Shefki Kuqi (Finland) leh Lorik Cana (Albania)-te chuan ram dang tan an khel mek a, FIFA danah ram pahnih tan khelh theih ni lo mah se Kosovo dinhmun bik hi FIFA chuan a ngaihtuah sak dawn.