Usyk vs Fury: Ni rei lo tê chiah a awm ta
Tunlai boxing khawvela thawm nei lian bera chhal ngam Tyson Fury chuan undisputed heavyweight champion nih tumin Oleksandr Usyk chu May 18 hian a hmachhawn dawn a, zan dar 9:30 aṭangin a en ṭan theih ang.
Riyadh, Saudi Arabia-ah boxer pahnih hi an intawng dawn a, Fury leh Usyk bakah hian fight dang pariat a awm dawn bawk a, mit a tlai dawn - Fury te an inhnek meuh chuan keini lam sanaah chuan zanlai a ni tawh hialin a rinawm.
Khawiah maw?
Boxer rothap pahnih intawnna tur hmun hi Kingdom Arena a ni a, he stadium-ah hian mipui 26,000 an leng - an khat hneh hle tura ngaih a ni a, Saudi Arabia chuan he inhnek thleng tur hian dollar maktaduai tam tak an seng niin an sawi.
Kingdom Arena hian boxing khawvela fight ropui tak tak vawi thum a lo thleng tawh a, nikum khan Tyson Fury vs Francis Ngannou leh Anthony Joshua vs Otto Wallin a lo thleng tawh a, kuminah Anthony Joshua vs. Francis Ngannou kha a thleng bawk.
Hlawh a tam
Boxer pahnih inhma-chhawnnaah hian dollar maktaduai 150 vel chu tlingkhawm tura beisei a ni a, Fury hian 70% a hlawh dawn avangin dollar maktaduai 100 chuang chu vawi khat inhnek aṭang hian a hlawh dawn tihna a ni a, sumin a hmuak a ni ber.
Khawthlang media ṭhenkhat report dan chuan Fury hian indona avanga harsatna tawk Ukraine ṭanpui nan dollar maktaduai khat a pe tur a ni, tih contract-ah an ziak tel. A hmachhawn tur Ukrainian boxer Usyk hian $30mtd vel a hlawh dawn thung.
An inchuh tur
Heavyweight boxing-a kawnghren ngaihhlut pali chu he fight-ah hian a awm vek dawn a, boxer pahnihin kawnghren pali kawl vektu nih an tum dawn - hei tak hi he fight tinghahhlelhawm tu a ni a, khawvelin a ngaihven lehzual phah.
Usyk hian September 2021 khan Anthony Joshua hnehin, WBA (Super), WBO, IBF leh IBO a hlawh chhuak a, kawnghren ngaihhlut hlawh chu WBA, WBO leh IBF a ni - Fury hian February 2020-a Deontay Wilder a hneh khan WBC kawnghren a hlawh ve bawk a, boxer pahnih hian an belt kawl lai ve ve an thap dawn.
An tlawm lo
Inrinni zana boxer pahnih inhmachhawn tur hi an record a turu hle - an la tlawm miah lo ve ve! Fury hian vawi 35 fight hmachhawn tawhin, vawi 34 a chak a, vawi khat draw a nei - heng zinga vawi 24-ah hian a khingpui a knockout a, a hnek na thawkhat tih a hriat. A fight hnuhnung berah October 2023 khan UFC star Francis Ngannou chu split decision-in a hneh.
Usyk hian tlawm la nei lo ve tho mah se, vawi 21 chiah fight a la hmachhawn a, a chak vek - heng zinga vawi 14-ah hian a khingpui a knockout a, a fight neih hnuhnun ber chu August 2023 kha niin, Daniel Dubois chu round kuanaah a knockout.
Sulhnu
Boxer pahnih hian professional boxing luhchilh nghal ngawt loin, amateur an khel phawt a, 6ft 9in-a sang Fury erawh amateur-a a sulhnu a ropui lutuk lo - engemaw harsatna avangin Olympic-ah ram ai a awh hman lo a, Europe huap junior championship-ah erawh gold a lo hlawh tawh.
Hetihlai hian 6ft 3in-a sang Usyk erawh Olympic 2012-ah khan gold a lo hnek chhuak tawh a, world championship-ah bronze leh gold la tawhin, european championship-ah gold leh bronze tho a lo hnek chhuak tawh a, world cup-ah silver a hlawh tawh bawk.
Enna tur
Fury leh Usyk inhnek hi May 18, Inrinni zan dar 9:30 aṭangin pekchhuah ṭan a ni dawn a, DAZN website leh app lamah pay-per-view kaltlanga en theih a ni dawn a, he inhnek en man hi Rs. 1,850 a ni dawn.
He thu buatsaih a nih lai hian television lama pekchhuahna tur tarlan a awm rih lo a, Mizoram aṭanga he inhnek en duh tan chuan insen huai ve deuh chu a ngai dawn niin a lang.
Human rights!
Saudi-ah boxer rothap pahnih an innuai dawn a, thawm lo nei ve hmasa ber chu mihring dikna chanvo humhalh duhtu pawl Amnesty International an ni a, mihring zalen lohna hmun Saudi-ah chuan Fury leh Usyk chu midang tana huaisen taka ṭawng chhuak tura an beisei thu an sawi.
Amnesty International economic affairs director (UK) Peter Frankental chuan, "Boxing hi Saudi-in an hmai bal phih fai nana an hmante zinga tel a ni a, kum 2019-a Anthony Joshua leh Andy Ruiz inhnek aṭang khan a inṭan daih tawh," a ti a, Fury leh Usyk chu ṭawng chhuak tura an beisei thu a sawi lang bawk.