Varane a chhuak dawn

Manchester United defender Raphael Varane chuan season tawpah Old Trafford a chhuahsan dawn. Kum 31 mi Varane-a hian tun season thleng bak contract a nei lo a, club lamin an pawh sei sak lo.

France international hlui Varane hian July 2021 khan Real Madrid aṭangin Man United hi pound maktaduai 31-in a zawm a, English club hi nikum khan League Cup-ah a champion pui.

Varane chuan, "Season hmang ṭha lo mah ila, hmalam hun erawh a êngin ka hria. Neitu thar an rawn kal a, tum fel fai tak an nei. Old Trafford-a match hnuhnung berah ka thlah che u, a ṭul dawn. Ka tan chuan hun danglam tak a ni ang," tiin a sawi.

Man United hian May 19, Pathianni zan dar 8:30-ah Brighton nen league match hnuhnung ber an khel dawn. An muala an match hnuhnung ber erawh zanin hian Newcastle United nen an khel dawn a, Varane hi inhliam vangin khel dawn lo mah se Man United ṭantute thlahna hun a hmang ang.