Last 16-ah Oska a chak lo

Rome khawpuia Naomi Osaka kir lehna chuan ngaihven a hlawh a, a tir lamah result a neih ṭhat avangin sawi a hlawh zual. Mahse, kum dang ang bawkin atan clay court hi chu a harsa a ni - Italian Open last 16 paltlang zo lo in a zinkawng a tawp leh ta.

Japanese star hi Zheng Qinwen nen an inkhel a, darkar khat leh minute 24 chhungin Chinese player zawkin 6-2, 6-3 in hnehna a chang; a match lehpekah chuan Paula Badosa hnehtu Coco Gauff nen an inhmachhawn leh ang.

World number 1 hlui, Grand Slam nomawi pawh pali ngawt la tawh Osaka chuan, "A nihna tak sawi chuan clay-ah hian ṭha takin ka khel ngai lo, chuvangin kumin ka khelh dan hi chu a lawmawm hleah ka ngai.

"Tun hma lam nena khaikhin chuan ka khelh danah hma ka sawn a,"a ti a, tun thla tawp lam aṭanga khelh ṭan tur French Open atan beisei a nei tih a sawi bawk a, thil awlsam tak erawh a ni dawn lo thung.

Osaka a chak loh lai hian Iga Swiatek erawh hma lam panin a kal zel. Madrid Open champion hian Angelique Kerber hnehin Italian Open quarterfinal a inhlangkai leh ta a, nomawi dang chawi turin match thum chak a la hmabak.

Polish star Swiatek hian match point a hmuh hmasak pasarih ngawt a chhawr ṭangkai thei lo, a vawi riatnaah tlangin 7-5, 6-3 in a chak - tun hnaiah a zawnin match kua a chak ta a, inelna lian atan inbuatsaihna a nei ṭha hle.