Kolasib club-in nge Lunglei club-in MPL khel dawn?

Mizoram Premier League khel tur zawnna MPL11 Playoff second leg chu vawiin chawhnu dar 2:00 hian RG Stadium-ah khelh a ni dawn. Kolasib club Project Veng leh SYS FC te an inkhel ang.

May 13, Thawhṭanni khan first leg khelh a ni a, SYS leh Project Veng te 2-2 in an inhnehtawk. Inelnaah hian away goal rule hman a ni a, first leg-ah inhnehtawk mah se Kolasib club dinhmun a ṭha hret.

Kolasib dinmun

Project Veng FC-in MPL10 an khel a, round tawp lama MPL champion Mizoram Police hneh thei an ni. Chutihrualin season bul an ṭan ṭhat tawk loh avangin pasarihna niin a tawp an khar.

Project Veng coach R. Lalrammawia (Patea) chuan, "MPL zawh khan playoff khel nghal ila, kan vanduai ka ring lo. Tunah erawh kan kim tawh lo a, MPL lai aiin kan ṭha tawh lo zawk. Khelh loh hlawh kan pe thei si lo a, loh theih loin January transfer-ah kan chhuah. Kum dangah chuan MPL Playoff hi MPL aṭangin fan tawh lo se, a duhawm hlein ka hria," tiin a sawi.

Kolasib club hian MPL-a player pawimawh Jessie Lalmawizuala, Samson Haubiakmuana leh Jack Lianlalmawi Neihsial te an kawl tawh lo a, player dang chân pawh an la nei. Coach Patea thlirna hi a dikna chen pawh a tam hle.

Project Veng coach Patea chuan sawi chhunzawmin, "First leg-ah khan away goal rule kan thlir tel avangin goal khung ngei kan tum a, tunah chuan goal kan nei ta bawk a, kan fimkhur leh a ṭul tawh ang. Kan khingpui team pawh an ṭha a, chak chiang kan ni lo," tiin Vanglaini a hrilh.

Kolasib club hian MPL10-a goal ruk khung thei Jehova Lalthangsanga an kawl a, best midfielder nominee-a awm pha Lalnuntluanga bakah Lengpui midfielder Lalrokima chu an la lut thar bawk. An player neih dan thlirin SYS aiin an puitling zawk a, pressure sang zo tur zawka ngaih an ni.

Lunglei lam hi

Lunglei club-in MPL an khel tawh. MPL3 Qualifier-ah Lallianzuala Chhangte hoin Lunglei FC an inpettling a, MPL3-ah an inlan. SYS FC-in MPL3 hnua a vawi khat nan Mizoram league sang bera khelh an tum a, MPL10-a pasarihna Project Veng hneh hi a harsa dawn.

SYS coach Lalmuankima chuan, "Project Veng player-te hi kan hriat ngai an awm meuh lo a, kan vawi khat hmuhna a ni hlawm. First leg-ah khan an theihna kan hria a, kan khing tawk tih kan hre tel bawk. Second leg-ah chuan inrintawkna nasa zawk kan nei thei ang," tiin Vanglaini a hrilh.

SYS hian hliam vangin striker Lalruatsanga an chhawr thei dawn lo a, player dang an dam kim. Lunglei club vanneihna chu playoff hmain qualifier match thum an khel a, inpuahchahna ṭha tak an neiah a ngaih theih.

MPL Playoff-ah hian away goal rule hman a nih miau avangin penalty shootout thleng tur chuan 2-2 bawka an inhnehtawk a ngai. Goal a lut lo emaw 1-1 a nih chuan Project Veng an chak ang a, 3-3 leh a chunglama an inhnehtawk a nih chuan SYS FC an chak thung ang.