Gujarat FA nen ṭhian ṭha takah kan insiam - Sports Minister

Mizoram sports minister Lalnghinglova Hmar chu Gujarat Super League hmasa ber kharnaah 'Chief Guest' a ni a, Gujarat Football Association nen ṭhian ṭhaah an insiam thu a sawi.

Tetea Hmar chuan, "Gujarat Super League final hmanpui turin min sawm a, an Chief Minister nen hun hmang dun tur kan nih laiin chawpchilh takin ani a remchang lo ta thut a, football ngaihsak vak lohna state ni ṭhina CM an ko kal thei tur a rem ta lo kha ka uipui hle," tiin Vanglaini a hrilh.

Gujarat chief minister hi Bhupendrabhai Patel a ni a, thiamna lamah chuan Civil Engineer niin kum 2021-a chief minister Vijay Rupani a ban khan hun rei lote chhung Chief Minister hna hi a thawk tawh. Kum 2022 khan Patel hi chiang taka thlan tlin a ni a, December 12, 2022 khan Chief Minister atana lakluh a ni.

MFA honorary secretary leh AIFF Eexcutive Committee Member ni bawk Tetea Hmar chuan, "Gujarat chu state hausa an ni a, an league thar pawh sum a tam nghalin team neitute pawh keini tana hausa tawntaw tih tur ṭhah mai an ni hlawm. An hmunhma a ṭha a, engkim mai an nei ṭha a, player erawh a ṭha ber ber an la nei bik lo.

"India ram football-in hma a sawn dawn chuan Gujarat hi in tel ve a ngai a ni, tiin ka zuk sawi a. Gujarat Football Association nen ṭhian ṭha takah kan insiam a; kum 2036 Olympic thlen an tumna chungchangah an sports lam hotute nen thui tak inkawmna kan nei bawk a, an sorkar mi pawimawh ṭhenkhat nen kan inkawm bawk a, a hlawk thlak khawp mai," tiin Vanglaini a hrilh.

Gujarat Super Legue chu

Gujarat Super League hi May 1, Nilaini aṭang khan ṭan a ni a, team paruk an awm. Chung team-te chu Ahmedabad Avengers, Gandhinagar Giants, Karnavati Knights, Saurashtra Spartans, Surat Strikers leh Vadodara Warriors te an ni.

GSL atana an budget hi nuai 250 vel a ni a, stadium hman manah nuai 47 an hmang. An stadium hi EKA Arena, Ahmedabad a ni a, entu 20,000 lenna niin a siam nan hian US dollar maktaduai 82.15 an seng.

Stadium hian 2019 Intercontinental Cup a thleng tawh a, 2022 National Games of India pawh football khelh nan hman a ni.

Mizo pawh an tel

GSL-ah hian player hi an auction a, AIFF hriatpui ni siin CRS registration an kalpui loh avangin eng player tan pawh khel theih a ni. Gujarat footballer-ten player ṭha an hmachhawn theih nan leh hma an sawn theih nan India ram hmun hrang hrang aṭangin player an chahlut a, hlawh ṭha tak an pek bakah kalna leh hawna flight man zawng zawng an tumsak vek.

Santosh Trophy hnuhnung bera Mizoram semifinal thlenpuitu player panga pawh GSL khel tur hian sawm an ni. Lalengmawia chu Surat Strikers-ah a khel a, HP Lalremruata leh Lalruatdika (Teka) te chu Ahmedabad Avengers-ah khelin FC Lalhmunmawia leh Vincent Lalduhawma te chu Gandhinagar Giants-ah an khel bawk.

Mizo telna team-in final an lut lo a, Pathianni khan Karnavati Knights chuan Vadodara Warriors chu penalty shootout hmanga hnehin an champion a ni.