Champions League & Real Madrid chu kawp tura duan!

Harry Kane-a'n champion nomawi chawi duhin Bayern Munich a zawm a, German club-a a season hmasa berah erawh nomawi a chawi dawn chuang lo - tun season-a nomawi beiseina an neih tawh chhun Champions League semifinal-ah an tlawm.

Nilaini zan khan Bayern hian Champions League semifinal second leg-ah Real an lenchilh a, Alphonso Davies-a'n Bayern tan goal hmahruai khung mah se Joselu goal hnih hmangin Real-in an chhanglet a, 2-1 in an chak daih.

Allianz Arena-ah team pahnih hi 2-2 in an inhnehtawk tawh a, second leg-ah Real an chak avangin inkhel pahnih belhkhawmah 4-3 in Spanish champion an chak - Real hian La Liga nomawi an chawi dawn chiang tawh a, Champions League nomawi chawi turin vawi khat chak chiah an mamawh leh ta.

Real hi Champions League-ah vawi 14 ngawt champion tawhin, an champion hnem ber lawr lak a, "Real leh Champions League chu kawp tura duan," tih loh rual a ni lo - kum 2014 hnuah ringawt pawh vawi nga an champion tawh!

Team hlauhawm zawk

Santiago Bernabeu-ah an chak lai hmuh châkin Real fans an pungkhawm a, inkhel pawh an thunun hneh hle. Vinicius Jr chu Bayern tlarhnung tana hna siamtu ber a ni a, Brazilian forward hi German club defender-ten an chelh meuh lo.

Spanish champion tan hian Vinicius chuan inkhel ṭantirtêah chance duhawm a nei a, mahse, Dani Carvajal-a siamsak chu a tlawh phak lo chiah chiah - uiawm tak a ni.

Vinicius hi a reh zui mai lo. Minute 13-naah chance dang a nei zui a, mahse, Carvajal-a siamsak chu post tihper nan a hmang - a per lehlam hi Rodrygo chuan chang mah se, Manuel Neuer-a'n a dansak.

Minute 28-naah Kane-a'n chance duhawm nei mah se, penalty box pawn aṭanga a 'shot' ṭha tak chu Real keeper Andriy Lunin chuan a kut hmawrin a khawih a, goal pawn chiahah a kal - Kane-a'n a thlirlet changin a ui vawng vawng ang.

A pawi zo ta

Second half-ah Bayern-in chance hlauhawm tia chhal theih an nei hmasa zawk a, mahse, bench aṭanga luhtir Alphonso Davies chuan uiawm lutukin bar chungah a thlawh - Bayern tan Kane chuan hun ṭha a nei zui a, mahse, English striker chance neih hi Lunin chuan a dansak.

Kane-a'n a tiṭha tawk lo tiin a sawi theih a, Real-in an nawr let zui. Mahse, Rodrygo-a'n an chance neih a hlah ve ve a, minute 59-naa a freekick pet, Neuer-a'n a lo dan hmante chu goalkeeper ṭha bik a nihzia pholanna a ni.

German keeper hi a hnu lawkah Vinicius chuan a enchhin ve leh a, mahse, Neuer paltlang theih a ni lo. Minute 68-na a ni a, Bayern zawkin goal an khung hmasa - Davies chuan ṭha taka ball a luhpui hnuah Antonio Rudiger a bum a, Lunin tana dan rual lohin a chhuih lut.

Bernabeu-ah Bayern ṭantute thawm a ring zawk a, Madrid fans an hawihai. Real hian a hnu lawkah Nacho hmanga si phurh sutah an inngai a, mahse, goal luhna kawngah Nacho hi Joshua Kimmich lakah a foul a, video assistant referee hmanga ennawn a nih hnuah goal-ah pawm a ni lo.

Chhandamtu Joselu

Minute 80 a thlen thleng pawhin Real-in si phurh sutna goal an khung hleithei lo a, fans tam takin Champions League final-a German club pahnih inhmachhawn tur an mitthla hman. Mahse, minute 81-naa luhtir Joselu chu thawnthu thlak danglamtu a ni.

Khel ṭha em em mai Neuer a chesual a, German keeper hian Vinicus-a shot naran tak chu dang mah se, a man nghet tawk lo a, a per lehlam chu Joselu hian rang takin goal-ah a chantir a, 1-1 a ni leh chiah.

Kum 34 mi forward hian a la duhtawk lo cheu! Hun pek belh minute khatnaah an chakna goal a khung leh a, Espanyol aṭanga loan-a Real pantu hian tun season-ah nomawi pahnih a chawi lo ang tih a sawi theih loh.

Joselu goal hi a tirah offside vangin pawm ni lo mah se, VAR a inrawlh hnuah goal-a pawm a ni. Bayern erawh an vanduai zui- Matthijs de Ligt chuan si phurh sutna a khungah inngai mah se, pawmsak a ni lo a, Borussia Dortmund nen final-ah an intawng dawn ta lo.