Leicester City-in nomawi an chawi ta

Thawhlehni zana Tottenham Hotspurs leh Chelsea an inhnehtawk zawhah Leicester City an champion tih a chiang a, chutichung chuan Claudio Ranieri hoten an khelh hmabak an ngaihthah lo. Inrinni zan khan King Power Stadium-ah ropui takin Foxes an khel a, Everton 3-1 a an hneh zawhah Leicester-in nomawi an chawi. Premier League champion thar chanchin hi thua sawifiah theih a ni lo.

Suangtuahna ram..

Leicester City boss Claudio Ranieri chuan, "Eng vangin nge suangtuahna ram aṭang hian kan ṭhan harh kher ang. Dinhmun ṭha zawk kan beisei chhunzawm zel tur a ni," tiin Everton an hneh zawhah beiseina sang zawk neih a ṭul thu a sawi.

Season ṭantira relegate tura an rin an champion meuh chuan nomawi chawi zan pawh a bu ang thlapin a kalah a ngaih theih. Italian manager Claudio Ranieri sawmna angin a hnampui zaithiam (tenor) Andrea Bocelli-a'n zaiin mipui a awi a, khelmual chhungah Everton player lut hmasain champion team rawn lut tur chu guard of honour an pe a, eng result pawh awm se zan duhawm bik a ni tawh tho tho.

Champion nge nge

Inkhel entu duthusam ang chiahin khelmual chhungah Foxes player-te an khelṭha a, mipui au hla chu 'Tu nge kan nih kan hria, keini hi England champion kan ni a, kan nihna hrilh nawn kan ngai lo, kan chiang em em a ni' tih a ni.

Season thara an jersey tur nena inlan Leicester City tan Jamie Vardy chuan minute 5-na lekah a khung nghal a, hrem hnua rawn let English striker hi a nung ṭha hle. Minute 33-naah Andy King-a'n Foxes goal hnihna a khung a, English midfielder hi Leicester youth system chhuak a nih bakah League One leh Cham-pionship lama champion puitu player pawi-mawh a nih avangin goal hlu bik a ni leh zel.

Vardy hian minute 65-naah ama penalty hlawhchhuah chu goal-ah a chantir a, Jeffrey Schlupp-a penalty hlawh erawh pet over-in English striker hian hattrick siamna hun ṭha a bawhpelh. Kum 29-a upa Vardy hian Premier League top scorer ni turin Harry Kane chu goal khatin a la pha lo.

Everton khelh ṭhat zan a ni lo a, Leicester laka chak loh avangin manager Roberto Martinez hmalam a chiang lo zel a, an mualpho lutuk tur hliah khuhna erawh Kevin Mirallas-a'n minute 88-naah a khung. Leicester-in nomawi an chawi zanah an mualah Everton 3-1 in an sawp a, an match hnuhnung berah Stamford Bridge an tlawh dawn a, season liam ta champion Chelsea-in champion thar Leicester City guard of honour an pe dawn!

An lawm tlang

Leicester winger Riyad Mahrez chuan, "Beisei phak bak a ni a, Leicester City-a nomawi ka chawi thei hi ka lawm a, ka chhuang tel bawk. Mipui an ropui a, kan hnathawh hi kan vai tan a ni," tiin a sawi.

Goal hnih khungtu striker Jamie Vardy chuan, "Penalty hnuhnung zawk kha pet over lo ilang chuan a nuam lehzual ang. Ka awm dan hi ka sawi thiam lo, kan vaiin kan thawkrim vek a, anmahni vanga goal khung thei kan ni a, kan hlawhtlinna hi kan thawhhona ṭhat vang a ni," tiin a hun tawn chungchang a sawi.

Leicester captain Wes Morgan chuan, "Sawi tur pawh ka hre lo. Nomawi kan chawi chiah kha chu a ropui thlawt a ni. Ka hun tawna ropui ber a ni. Mumang ram kha a ni ṭhin a, tunah chuan a tak ram a ni ta, lawm mai loh chu tih theih kan nei lo," tiin a sawi.

Leicester champion puitu manager Claudio Ranieri chuan, "Nomawi chawi hi ka beisei ṭhin a, helai hmuna ka rawn kal tirh erawh kha chuan ka beisei lo. Amaherawhchu club lian an chesual fo a, keini erawh kan ngai reng. Neitu ṭha tak kan nei a, ṭantu ṭha tak kan nei a, dressing room ka tlawh hmasak ber khan boruak a ṭha tih ka hmu. Italian rilru put hmang ka tuh a, ṭantirh lamah fuh tawk lo mah se a hlawhtling hle," tiin team rilru puthmang a thlak thu a sawi.

Italian manager Ranieri chuan sawi zelin, "Mipui vang chauha champion thei kan ni a, season tluana min ṭawiawmna vang leh kan chunga beiseina an neih vang chauha champion thei kan ni. Nomawi hrim hrim chu Spain leh Italy-ah te ka lo chawi tawh a, amaherawhchu Premier League nomawi chawi erawh beisei phak bak a ni," tiin supporter-te a fak.

A ropui e

Leicester champion hi infiamna chanchina ropui ber ang hiala sawi a ni a, infiamna pawn lam nen pawh an tehkhin nasa hle. Season ṭantirh kha chuan Leicester ṭantuin a mumangah an champion lai hmu se, a harh hnuah ngaihdam a dil a ṭul hial ang tih a ni. Tunah erawh an champion ta a, thlaa mihring lawn ṭum nen hial an sawi zawm, a ropui a ni ber e.

Leicester City hi 2008-09 season khan League One-ah an champion a, 2013-14 season-ah Championship-ah nomawi chawi lehin Premier League-ah an inpet kai. Thla 12 liam ta kha chuan Foxes ṭantu te 'Premier League kan khel zel dawn' tiin an au rual a, tunah chuan 'Kan champion' tiin a au rual tawh.

Foxes hian May 16-ah champion kawng zawh an nei dawn a, King Power Stadium
aṭangin an ṭan ang a, Leicester Park-ah an tawp ang. A tira tum dan chuan Town Hall Square-ah tum a ni a, mipui pungkhawm an ṭhathnem dawn avangin a lawmna hmun hi sawn a ni.

Old Trafford, Ewood Park, Highbury, Stamford Bridge leh Etihad Stadium-ah te Premier League nomawi an lo chawi tawh a, King Power Stadium hi a danglam bik a, a ropui ber bawk.