Ngai teh, Indian football lal thar pekin kan awm ta; A hming Lallianzuala

Indian football-in lal thar a nei a, a hming chu Lallianzuala Chhangte a ni - India ramin football legend ropui tak tak a lo nei tawh ṭhin a, Sailen Manna, P.K. Banerjee, I.M. Vijayan, Bhaichung Bhutia leh Sunil Chhetri te chu a langsar zual tiin a sawi theih.

Heng footballer-te hi thawnthu hlui an chang tawh a, Chhetri meuh pawhin uai thlak lam a pan ve ta. "Tu nge Chhetri thlak ang?" tia Indian football ngainatute an inzawh laiin Lallianzuala Chhangte a lo lang e.

Ni e, nangmah ang thoa YMA member, thlan lai ṭhin, khawhar in riak ṭhin, Pathiannia sande sikul kai ve ṭhin kha India rama football roreltu a ni mek e - Lianzuala hian Thawhṭanni zan khan Indian Super League semifinal second leg-ah goal a khung a, Mumbai City chu FC Goa lakah 2-0 in hnehna a chanpui.

Mumbai tan Lianzuala bakah Jorge Pereyra Diaz chuan goal khat a khung ve bawk a, Goan club-in a chhanletna tur an nei lo. Mumbai-in inkhel pahnih belhkhawmah 5-2 in hnehna an chang a, May 4, Inrinni zanah Mohun Bagan nen champion an inchuh ang.

Phuba thamral!

Goa khelmuala tema pahnih an intawn hmasakin, Mumbai hian 3-2 in hnehna an chang a, an goal thum hi minute 90 hnua lut vek a ni - goal hnih hi Lianzuala khung a ni a, Mumbai player-te lawm lutuk an sapatal.

Hei hi Goa coach Manolo Marquez chuan a hrethiam lo a, Mumbai player-te chet dan a dem. Spanish coach chuan, "Player chu ni ila, Mumbai player-ten kan hmai hmaa chak an lawm dan khan min tithinrim ngawt ang. Minute 90 dang a la awm tih hre rawh se.

"Mumbai-ah tuin nge chak chu lawm zawk ang, kan hria ang chu," a ti deuh sak a, Mumbai hneh a tum ruh hle. Player an neih dan en pawhin Goa hi Mumbai khelmuala chak tum ngam turin an ṭha tawk.

Tlarhmaah Barcelona academy chhuak Carlos Martínez a mal tlat a, number 10 Brandon Fernandes thiamzia kan hria a, mual sir aṭanga thlawptu Noah Sadaoui lah Morocco tana inlan phak a ni a, Goan club an ngaihtuahawm lo.

Mahse maw

Mumbai Football Arena-ah Goa beisei ang erawhin thil a kal thei lo a, goal an khung thei lo a ni mai lo a, mumalin an nawr thei lo - Goa hian semifinal first leg-a an ngam loh Lianzuala bawk an ngam lo a, Lunglei tlangval a tal hiar takzet.

Minute 10-na lekah Lza hian Jorge Diaz siamsak aṭangin chance a nei a, mahse, a pet na tawk lo. Mumbai tan defender Tiri pawhin hun ṭha a nei a, mahse, corner aṭanga ball kal chu post tauh per nan a hmang.

Lianzuala'n chance a nei ve leh zui - Mizo tlangval hian mual vei lam sir aṭangin a pet a, mahse, post a pet per. Lianzuala ball pet a fuh tawk lo a, AIFF Player of the Year hi a vanneih zan a ni dawn lo em ni aw, tih mai tur a ni.

Goal lut loin chawlhlawk hman zui a ni a, Mumbai-in an mualah inkhel an thunun. Second half ṭantirah Goa an rawn 'hot' a, Noah Sadaoui chuan chance ṭha vawi hnih ngawt nei mah se, a vanneih zan erawh a ni bik lo.

Kha le Lza

Minute 60-na a ni a, Lza bawk kan hmu. Midfielder Lalengmawia Ralte ball pek chu a insiamrem hnuah Lza hian 'shot' mah se, goal chungah chiah a kal a, uiawm tak a ni.

Mumbai an vanduai reng lo - minute 69-naah Diaz chuan a khung ta nge nge a, corner aṭanga ball kal, Mumbai captain Rahul Bheke-a tauh chu Goa keeper Dheeraj Singh-a'n lo dang mah se, a per lehlam chu Diaz hian goal-ah a chantir.

First leg-a hnehna changtu Mumbai-in inkhel pahnih belhkhawmah 4-2 in hma an hruai a, Goa tan a harsa tawh dawn tih a chiang - an manganna leh buaina belhchhah turin Lza a inlar ve leh a, Vikram Pratap Singh ball pek chu ṭha taka tlan luhpuiin, keeper a tlan hel hnuah chiang zetin a khung. A goal khung hnuah pawh Lianzuala hian chance nei lehin, a vannei lo thung.

Inkhel entu zinga Ranbir Kapoor leh Alia Bhatt ten Mizo tlangval goal khung lawma kut an beng lai kha in lo hmu em? Lianzuala vangin Mumbai ṭantute hlimin an zai a, 2-0 in Goa an hneh a, ISL final an lut ta.

A hmasa ber

Lallianzuala Chhangte hian season hmasa khan league match 22-ah goal 10 khungin, assist vawi ruk a nei a, ISL hero of the league atan thlan niin, Sunil Chhetri tih loha Indian zinga he dinhmun luah thei hmasa ber a ni.

Lianzuala'n beisei angin season bul ṭan ṭha lo mah se, ama sawi ang ngeiin hun pawimawhah a che ṭha a, he nau hian boruak sang hi nuam a ti zawk mah emaw tih mai tur a ni - goal 10 a khung tling leh ta!

Lunglei tlangval hian match 24 khel tawhin, goal 10 a khung bakah, assist vawi ruk a nei a, Mumbai City hi ISL nomawi a chawipui a nih ngat chuan a zawnin hero of the league award hi a dawn ngei a rinawm.

Lza'n season zawnin goal 10 a khung tling ta a, Indian player zingah ISL-a a season zawna goal 10 khung thei an la awm ngai lo - Sunil Chhetri meuh pawhin a tih theih loh kha Mizo tlangval hian a tithei leh ta.

Pathian chawimawitu

Lza'n sulhnu ropui a hnutchhiah apianga hming a lam hmasak ṭhin chu Pathian a ni a, tunah pawh a danglam lo. Lianzuala chuan, "Pathian awmpuina a ni e," tiin final an luh chhan chu Pathian vang a nih thu Vanglaini a hrilh.

Mizo forward chuan sawi zawmin, "Season bul ka ṭan ṭha lo a, ka chungah beiseina a sang bawk nen, ka hnual ve hman hle. Mahse, ka harsatna khan Pathian nen hun tam zawk min hmantir a, ka thlarau nun a hlawk phah.

"Mihring tak pawhin theihtawp ka chhuah reng a, kan chak emaw chak lo emaw, goal ka thun emaw, thun lo emaw, ka lut emaw ka lut lo emaw, ka tihdan ka thlak lo a, a hma aia nasain ka bei ṭhin," a ti a, a thawhrim rah a seng thu a sawi.

Thawhṭanni zan inkhelah hian Lza bakah Apuia chuan inkhel bul a ṭan a, defender Hmingthanmawia Ralte (Valpuia) chu bench aṭanga lutin, Goa tan Dinthar tlangval Ayush Chhetri chu minute 60-naah luhtir a ni bawk.