Champions League khel lo tur Man United

Manchester United-in season tharah UEFA Champions League an khel dawn lo. Erik Ten Hag-a hote hi Inrinni zan khan Burnley-in an mual Old Trafford-ah 1-1 in an chelh a, point khat chauh an hlawhchhuah avangin palinaa awm mek Aston Villa an umpha thei tawh lo.

Unai Emery kaihruai Villa pawhin Chelsea laka point khat chauh an hlawhchhuah avangin UCL khel thei lo thei dinhmunah an ding. Villa Park-ah Emery hoten goal hnih khung hmasa mah se Blues-in Noni Madueke leh Conor Gallagher te hmangin an chhanglet a, 2-2 in an inhnehtawk.

Vanduai nge tihsual?

Old Trafford-ah Man United-in relegation zone-a awm Burnley an hmachhawn a, Ten Hag-a hoten inkhel an thunun thei bik lo. Vincent Kompany kaihhruai Clarets-in ball an chang tam zawk a, chutihrualin team pahnih goal khung an tum ve ve avangin goal chance pawh a tam.

First half-ah goal a lut lo a, second half-ah pawh a goal a lut lawk lo. Ten Hag-a'n result ṭha neih beiseiin Scott McTominay leh Amad Diallo te a luhtir a, thil tih awm tak ni mah se an thlakte hi Rasmus Hojlund leh Kobbie Mainoo te an ni. Dutch manager thutlukna avangin hun tawp lamah Man United-in natural striker nei loin an khel.

Mahse, Clarets tihsual zarah mualneituin goal an khung tho a, Antony-a'n ṭha taka lalutin minute 79-naah goal hmahruai a khung. Man United hi hnehna chang turah ngaih theih tawh mah se hun tawp lamah an vanduai.

Casemiro tihsual aṭanga ball kal zel chu Aaron Wan-Bissaka-a'n a tauh chhuak a, mahse ball awm tawh loh hnuah Andre Onana a chesual. Onana hian hnek chhuah tuma lo zuang vein Burnley player Zeki Amdouni a hnek fuh. VAR hmanga en let hnuah penalty pek a ni a, Amdouni hian minute 87-naah siphurh sutna goal a khung.

Man United tan Antony a langsar zui a, Brazilian forward hian goal-ah ṭha zeta petin Clarets left back Vitinho kut chu chiang takin a per. FA Cup semifinal-ah handball vangin penalty an chawi a, Premier League-ah erawh penalty an hmu ve lo. 1-1 in inkhel a tawp.

Martinez a inhliam

Aston Villa-in ṭha an ni tih an lantir a, Villa Park-ah hma takah goal an khung. Minute lina lekah Lucas Digne ball pet chuan Marc Cucurella perin goal-ah a lut.

Chelsea-in chance an nei a, VAR hmangin an goal khung pawmsak an nih loh bakah goal ban a tauh per bawk. Mahse, Villa bawkin goal an khung a, Morgan Rogers-a'n a khung ṭha hle.

Halftime-ah Emiliano Martinez chu malpui hliam vangin lakchhuah a ni a, Argentina no. 1 awm lo hi second half-ah a lang. Chutihrualin Chelsea an khel ṭha ve bawk a, Noni Madueke leh Conor Gallagher te finishing a tawih hle. Keeper Robin Olsen tan dan ngaihna awm lo a, Martinez pawhin a dang lo ang.

Injury time-ah Cole Palmer-a'n chakna goal a khung teuh a, Axel Disasi-a'n chakna goal a khungah a inngai bawk. Mahse, Disasi-a'n a khung hma hian Benoît Badiashile-a'n amah vengtu a kut hmanga tihsawn vangin pawm a ni lo. A tawpah erawh Chelsea an vanduai a, Villa an vannei ta zawk.