Reliance Foundation buatsaih naupang inelna a hlawhtling

Reliance Foundation Youth Champs (RFYC) Inter District Championship 2023-24 chu hlawhtling takin April 27, Inrinni khan RG Stadium-ah khar a ni a, Under 12 leh Under 14 inelnaah Aizawl Best of the Rest an champion ve ve. A kharna hunah hian MFA honorary secretary Lalnghinglova Hmar, India international hlui Jeje Lalpekhlua bakah phai lam aṭanga RFYC academy lead Yash Patel te an tel.

Reliance Foundation zarah naupang ṭhahnem takin awmze neiin football an zir a, a lawmawm hle. Mizo football legend leh RYFC mentor S. Malsawmtluanga (Mama) chuan, "Football bakah a piah lama hma an sawnna hi ka lawm. Naupang League kaltlangin discipline an zir a, nungchang mawi an zir a, hun pawimawhzia an zir a, ṭhenrual kawm an zir a, ṭhian an neih belh bawk. Season khat chhunga an hmasawnna hian minti lawm a, Reliance Foundation hnathawh hi a ropui hle a ni," tiin Vanglaini a hrilh.

A kalphung chu

RFYC hmalaknain Mizoram district pali Aizawl, Champhai, Lunglei leh Kolasib-ah naupang inelna kalpui a ni. Aizawl leh Champhaia inelna hi Naupang League tih a ni bik a, hetah hian Under 8, Under 10, Under 12 leh Under 14 inelnaah a awm. Team 12 an awm a, team tin hian category paliah team neih vek a ngai. Team tin hian season khat chhungin match 33 ṭheuh an nei.

Lunglei leh Kolasib hi District League tih a ni a, kum bithliah pali tho a awm mah se season khat chhungin match 24 an khel thung. Inelna hi September 2, 2023 aṭangin April 6, 2024 chhung neih a ni a, thla sarih chhung vel zet inelna hi school chawlh laiin kalpui a ni.

Inelna kalphung duangtu Richard Hood chuan, "Football-a hmasawnna nei tur chuan player-ten competitive match an khelh tam a ngai a, an goal khung zat leh an result felfai taka record hian player-te hmasawnnaah nasa takin a pui a ni. Training hi a pawimawh a, an training ang te, a takin a ti thei em tih hriat nan match hi a pawimawh," tiin Naupang League-in a tum Vanglaini a hrilh.

Inter Dist C'ship chu

Inter District Championship hi Under 12 leh Under 14 inelna a ni a, District pali Aizawl, Champhai, Lunglei leh Kolasib champion ṭheuh an tel. Hei bakah hian District pali aṭanga champion team-a tel lo, a ṭha thlan khawm (best of the rest) an tel leh bawk. Under 12 leh Under 14-ah team riat ve vein inelna an hmachhawn tihna a ni.

April 23, Thawhlehni aṭang khan inelna hi ṭan a ni a, vawi khat ṭheuh an inkhelh kual hnuah a sang paliin semifinal an lut. Zirtawpni khan semifinal khelh zawh a ni a, final leh lawmman semna hi April 27, Inrinni khan RG Stadium-ah neih a ni. Naupang nu leh pa bakah tualchhung football-a tui engemawzatin a hmunah an en.

Kum bithliah inelna a nih angin field puitlingah an khel lo a, field chu naupang khelhna tur tawka tizimin goal pawh a te deuh. Reliance Foundation buatsaih inelna danglamna chu a lan dan hrim hrim a mawi a, advertising board-in khelhna chin pitch chu a hual chhuak.

Inelna hmachhawntu naupang vanneihna chu a enkawltu coach-te hi player an nih lai pawha tawnhriat nei ṭha tak tak an ni a, Lunglei enkawltu zingah India international midfielder hlui Lalrindika Ralte bakah ISL player hlui Lalrempuia te an tel. Aizawl lamah Shillong Lajong leh Royal Wahingdoh-a hming chher tawh C. Lallawmzuala te an awm bawk.

A kal zel dawn

Mizoram chhunga Naupang League buatsaih danah RYFC aṭanga hotu rawn kalte an lawm a, season tharah pawh ṭha zawkin a kal zel dawn. Kuminah pawh player chauhin hma an sawn lo a, coach-te pawhin hma an sawn. Aizawlah Robert Roelofsen (Netherland, Head of youth RFYC), Stephen Charles (India, Head of Scouting RFYC) leh Mark Vaessen (Head Coach Education, RFYC) te lo kalin training an neihpui.

RFYC buatsaihin tun season-ah referee development programme (vawi khat) leh coach educator programme vawi hnih an rawn buatsaih tawh bawk. Coach te hian tun season chhungin tawnhriat ṭhahnem tak an neih belh bawk a, season tharah hmasawnna hmuh tur a awm ngei ang.

Naupang League aṭang hian Reliance Academy-a awm turin mi parukin final trial an nei a, AIFF-FIFA Academy-a awm turin mi pakhatin final trial a hmachhawn bawk. Tun ṭum Inter District aṭang hian player thlan chhuah 40-in Mumbai-ah exposure tour an nei bawk ang.