Vanglaini - Sergio Perez a dam tawh

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Sergio Perez a dam tawh

Racing Point driver Sergio Perez chu Covid-19 lak aṭangin a fihlim tawh a, tun kar tawpa Formula 1 Spanish Grand Prix an tlan hunah a inlan thei tawh ang - hripui a kai vang hian intlansiak pahnih a hmachhawn thei lo hman a ni.

Kum 30 mi Perez hian an ram Mexico-a awm a nu a tlawh a, hripui hluarna hmuna a kal hnu hian coronavirus a kai tih hriatchhuah a ni. Silverstone tlan kawngah a tlan ve thei ta lo a, vawi hnih ngawt a inlan loh avang hian championship lamah pawh beisei a sang thei tawh lo ang.

Ningani khan Racing Point chuan an driver hi a dam tawh thu an puang a, a inlan theih loh laia a aiawhtu German driver Nico Hulkenberg a rawn nek chhuak leh nghal dawn a ni.

Share this Post

Login to comment

No Comments