ASF chungchangah sorkar thu zawm a ṭul

Aizawla vawk pûl hri, African Swine Fever lênna vêng pakhatah tun hnai, April 20 leh April 25-ahte vawk damlo talh an awma sawi a nih avangin AH&Vety department chuan police-ah FIR an thehlut a, vawk damlo talhtute hming leh address pawh chiang takin an tarlang.

Mizoram hmun ṭhenkhatah ASF a lên mek avangin vawk damlo talh lo tura AH&Vety department-in mipui an zirtir mek lai leh, bawrhsapte'n vawk damlo talh phal a nih loh thu te, district dang aṭanga vawk lah luh khap a nih thute thupek chhuaha an puanzar mek laia ASF lênna vengah leh nghal vawk damlo talh an awm nia sawi hi a dik a nih chuan a zialo tak zet.

Vawk damlo talhtute hian mipui hnena hralh tuma talh an nih ngei hmel a, mite'n vawk damlo sa ei se pawi an ti lo tihna a ni a, vawk damlo sa an ei avangin an hriselnain tuar pawh ni se pawi an ti lo tihna a ni bawk. A pawi mai ni loin, a rapthlak a, a rilru chhiatthlak tia sawi theih a ni.

Tihdamna damdawi awm lo ASF hri léng hi a chimawm tak zet . ASF vanga vawk vulhtute tawrhna a pawi ṭhin hle. Mi tam tak chuan eizawnna dang nei loin, vawk vulh hmangin ei an zawng a; chutih laiin, an eizawnna ber an vawk a thi puk puk mai ṭhin hi a pawi tak zet a, an khawngaihthlak hle.

AH&Vety department chuan vawk damlo leh thi a awmin an hnena hriattir vat turin mipui an ngen a; vawk damlo chu dah hran vat tur a nih thu te, vawk damlo talh leh hralh khap tlat a nih thu leh ti luite chu hrem theih an nih thu te, vawk damlo sa chu mihring ei atan a him loh thute an lo puangzar tawh.

ASF hi a darh zel lohna turin Mizoram mipui kan ṭan tlan a ngai a, sorkar pawh a ṭan sauh sauh a ngai bawk. Sorkar hmalaknate hi mipuiin ṭawiawm ṭha ila, ASF a darh zel lohna tura thupekte pawh ṭha taka zawm zel hi mi tin mawhphurhna a ni.