Player chungah Celtic boss-a lawm lo

Celtic manager Neil Lennon chuan quarantine dan bawchhia a player Boli Bolingoli chu na takin a sawisel a, "Player dang tan lawm taka pawm chu a harsa tawh khawp ang," a ti!

Celtic defender Boli Bolingoli hi Spain-ah a zin ru a, mahse dan anga in khung hrang (quarantine) loin Kilmarnock an hmachhawn ṭumin a inkhel - a hnuah hriatchhuah a ni a, Nilaini zana St. Mirren nena an inkhel tur chu sawn a ni hial a, Inrinni zana Aberdeen nena an inkhel tur sawn a ni bawk.

Neil Lennon chuan, "Player-te pawh an lungawi lo a, an thinrim takzet. Mahni hmasial taka player pakhat chet duh dan hi hriatthiam a harsa. Kan rinna zawng zawng engmah loah a chantir a, a thinrim thlak a ni," a ti. 

Celtic player-te hi 2020-21 league match hmasa bera 5-1 a Hamilton an sawp hnuah chawlh pek an ni a, mahse club innghahna khawpui Glasgow chhuahsan lo tura hriattir an ni. Boli hian hei hi ngai pawimawh loin August 3 khan Spain-ah a zin a, a tukah a haw lehnghal. 

Scottish Premiership hian Boli hma hian buaina an lo tawk tawh a, lockdown dan bawhchhiain Aberdeen player pariat chu kar hmasa khan 'bar'-ah an lo kal ho tawh - Aberdeen pawh hi Nilaini zana Hamilton nena an inkhel tur chu sawn a lo ni tawh. 

Celtic chuan Bolingoli chet dan avang hian ngaihdam an dil a, kum 25 mi Belgian defender hi khunghran mek niin a chet dan avang hian ngaihdam a dil ve bawk.



Share this Post

Login to comment
No Comments