Australia : Hmeichhe chunga tharum thawhna hremna dan khauh zawk phût

Australia khawpui, Sydney leh khawpui dang hrang hrangah kar liam ta Inrinni khan hmeichhe chunga tharum thawh ṭhinte dan hmanga hremna na zawk pek an nih theih nan rally huaihawt a ni. Rally neihnaa tel ve, Australia prime minister, Anthony Albanese chuan hmeichhiate chunga tharum thawh hi Australia chhunga thil thleng hluar tak a nih thu a sawi.

Sorkar zir chiannain a tarlan danin, kumin chhung hian Australia ramah hmeichhe chunga tharum thawhna avang hian ni li danah hmeichhe pakhat zelin nunna a chân tih an tarlang. Tun thla tir lam pawh khan Sydney-ah mi paruk vih hlum niin, an zinga panga chu hmeichhia an ni a, hemi avanga lungawi lo hi an ṭhahnem hle a ni.

Rally neihnaa pung khawmte chuan hetiang pawikhawih chingte hremna turin dan khauh zawk siam an duh tih sawiin, hmeichhiate chunga tharum thawhna thleng ṭhin an demna thu an tarlang tel bawk. Prime Minister chuan Australia chhunga hmeichhiate lungawi lohna ṭawmpuiin, rally-ah hian a tel ve tih a sawi a, tharum thawhna thleng ṭhin chu tihtawp vat a ngaih thu a sawi bawk.

Australia khawpui dang-Adelaide, Perth, Western Australia, Melbourne, Victoria, Hobart, Tasmania, Brisbane leh Queensland-ah pawh lungawi lohna leh dan khauh zawk siam tura sorkar nawr nan rally hi huaihawt a ni ve bawk. Adelaide a mi tam tak pung khawm hmaa thu sawitu, Greens Party Senator, Sarah Hanson-Young chuan an buaina chu ram pum huapa ngaihtuah a ngaih thu leh hmalak thuai a ngaih thu a sawi. Hanson-Young chuan hmeichhiate chuan an chunga tharum thawhna thleng ṭhin chu an ning tawh takzet niin a sawi bawk a ni.