Social media lar Twitter chuan Manchester United defender Phil Jones chungchanga fiamthu an thawh avangin Red Devils hnenah ngaihdam an dil a, Jones an fiamna chu an delete (paih bo) tawh thu an sawi bawk. 

Twitter hnuaia TwitterUK account chuan, "Phil Jones aia footballer ṭha zawk min hrilh rawh u," tiin an tweet a, tun season-a United tana match riat chiah la khel hi an tih el. 

Mahse, TwitterUK chet dan hian an beisei angin mipui lawm a hlawh lo a, United thuneitute beng hial thlengin Premier League club hian an lungawi lohna an tilang. 

Twitter chuan thuchhuah siamin, "Mi lawm lohna thlen tuma thil ti kan ni loa, kan tihsual kan hriat rualin tweet pawh hi tihbo nghal a ni," an ti a, an thil tweet chu feature thar an siam, post-a comment thei chin an siam pholan nana ti an nih thu an sawi. 

Kum 28 mi Jones hian June-a English football khelh chhunzawm a nih hnuah United tan match a la khel leh lo a, Germany-a Europa League mini-tournament khela zin chhuak squad-ah pawh a tel lo. 

---

Share this Post