Manipur : Bishnupur district-ah CRPF pahnihin nunna an chân

Chi leh chi inkara buaina chhuak avangin Manipur chu nikum May 3 aṭang khan a buai ṭan a, kum khat dawn an buai hnuah pawh remna leh muanna kawng an la zawh hleithei lo. Kar hmasa tawp lam khan Meitei leh Kuki-Zo inkarah buaina chhuak lehin, nunna chân pawh an awm nual. Heng zingah hian central sipaite pawh an tel a ni.

Central Reserve Police Force (CRPF) pahnih chuan helpawl beihna avangin nunna an chân. Bishnupur district-a thil thleng hi tute tih nge hriat a ni lo a, Inrinni zing lama thil thleng niin, CRPF-te hi 128 Battalion hnuaia mite an ni.

April 27, Inrinni zing lamah ralthuam keng helpawlte chuan Bishnupur district-a Naransena huam chhunga khaw pakhat an bei a, helpawl lam bomb chuan 128 Bn CRPF awmna hmun chu a fuh ta a ni. Bomb puak avang hian mi paliin hliam an tuar a, an zinga pahnih chu an hliam tuar loin an boral.

Manipur chief minister, N Biren Singh chuan inbeihna thleng chu a dem thu leh, dawizepthlak a tih thu a sawi. CM chuan CRPF-te chu remna leh muanna a awm theih nan theih tawpa ṭan latu an ni tih a sawi bawk.

CRPF beihna hi Kuki-Zo lam tih nia rinna a lian hle a, mahse, Kuki-Zo hnam pawl lian tak tak - Kuki Inpi Manipur, Committee on Tribal Unity (CoTU) leh Indigenous Tribal Leaders' Forum (ITLF) te chuan Kuki helpawl tih a nih loh thu chiang takin an tarlang thung. Kuki Inpi Manipur chuan Imphal phairuama chetla ṭhin helpawl tih a nih thu an sawi a, central security force-te'n mipui him nana an hnathawh chu chhuanawm an tih thu an tarlang. Thuthar thehdarhtute chu finfiahna mumal awm loa rin thu ringawt an chhuah ṭhin avangin an dem tih an tarlang tel bawk. CoTu leh ITLF pawhin thil thleng an dem thu tarlangin remna a awm theih nana central force pawimawhzia an tarlang ve bawk.

Sinam Kom inbeihnaah Meitei pakhatin nunna a chân

Manipur police chuan thuchhuah siamin, Kangpokpi leh Imphal East district inrina bul, Sinam Kom hmuna inbeihnaah Meitei pakhatin nunna a chân tih an tarlang. Hnam pahnih village volunteer-te inbeihna ni ngeia hriat niin, Zirtawpni zanah inkahna hi a thleng a ni. Police chuan Inrinni zing khan ruang hi chhar a nih thu an tarlang. Buaina a sosan belh zel loh nan force lam mite chu Sonam Kom leh a chhehvela venhimna kengkawh turin tirh luh nghal an ni.

Kangpokpi-ah Kuki-Zo volunteer pakhatin nunna a chân

Kangpokpi district-ah buaina a chhuah thar leh avangin Kuki-Zo volunteer pakhat chuan nunna a chân. Nimin zinga inkahna hi Leimakhong-Kangchup chhehvela thleng niin mi pakhat a thih bakah hliam tuar pathum an awm.

Leimakhong-Kangchup velah hian boruak a ṭhat loh vang leh inkahna a chhuah mai hlauhthawnna avangin Kharam Vaiphei leh L. Phaijang khuaa nunaute chu Inrinni zing khan hmun him lam panpui an lo ni tawh. Nimin zingkarah inkahna chu a chhuak ta ngei a, Kuki-Zo volunteer, Bethel khuaa mi chuan nunna a chân a ni.

Kuki-Zo volunteer nunna chân an awm avang hian Committee on Tribal Unity (CoTU), Sadar Hills chuan nimin chhun dar 12 aṭanga zanlai dar 12 thleng khan Kangpokpi district chhungah bandh an huaihawt. CoTU chuan thuchhuah siamin, Meitei helpawl leh Arambai Tenggol chuan State Police puihna hmanga a ruk a rala mi an beih avanga nunna chân an awm hi pawi an tih thu an tarlang a, nunna chân ta hriatreng nan darkar 12 awh bandh huaihawt an nih thu an tarlang tel bawk.