Mahse, 2019-20 season a her chhuah meuh chuan Wolves hi Premier League-a 'Big Six' ngam ber pawl an ni leh der tawh a, European football-ah rei tak an inlan loh hnuin Europa League-ah quarterfinal hial an lut bawk.
English club hian a thiam pali zinga tel tura chona an hmachhawn erawh an paltlang zo lo a, anni aia tawnhriat nei ṭha zawk Sevilla lakah an tlawm. Mahse, Wolves tan striker Raul Jimenez chuan penalty a pet goal loh miau avangin an 'vanduai' ti pawhin a sawi theih.
Wolves boss Nuno Espirito Santo chuan an chak loh chhan chu an squad chhah tawk loh vang a nih thu a sawi a, a player-te an inkhelh hnem avangin an chauah a ngai - nipui transfer-a bazar turin hotute a kar tihna a ni.
Mamawh belh
Nuno chuan, "Kan squad hi a te em em a, player dang kan mamawh belh a ni. Tunah erawh chawlh hahdam kan mamawh a, season thar atan ṭha taka inbuatsaih kan mamawh dawn.
"Kan ṭhan zelna tur atana thutlukna siam thiam a ngai a, kan hun tawnte thlirkir hun a ni. Kan match hnuhnung bera inkhel bul ṭantute kha season ṭantira kan match hmasa bera bul ṭantute tho an ni," a ti.
Portuguese coach chuan sawi zawmin, "Kan hma hun thlir ila, kan mamawh kan thlir a ngai. Club nuam tak a ni a, thutlukna dik kan siam chuan kan ṭhang lehzual ang," a ti a, bazar a duh.
Covid-19 vangin Premier League club liante pawhin sum hman an harsat a, Wolves hi an duh ang takin an bazar thei ang em, tih chu zawhna lo piang a ni a, mahse club liante pawhin an awh Nuno leh a player-te chelh tur chuan board of directors tan khawmuan a thiang lo.
Squad chhah lo
Wolves-in Europa League-ah match 17 an khel hman a, Nuno-a'n nomawi chawi a duh avangin a neih ṭhat dan berin player a khelhtir tlangpui - an player zinga pariatin tun season chhungin match 50 an khel tling!
Tun season Premier League-ah player 21 chauh an hmang a, anni aia player hmang tlem an awm lo. Wolves tan hian captain Conor Coady chuan tun season-a match 59 an khelhah vawi 57 a inlan.
Liverpool academy chhuak defender hian Carabao Cup match hnih a khel lo tih loh chu a khel kim vek a, match 57-a inlanah hian minute tin a khel kim vek - tun season-ah minute 5,130-a inkhel tling!
Coady chuan, "He inelnaah hian lo kir leh ngei kan duh. A tikimtu mai nih kan duh lo a, a sang pariat zingah kan tel. Kum thum liam ta lawka Championship khel kha kan ni a, record ropui tak a ni," a ti.
Tichuan...
Nuno-a'n player lei belh a duh a, Coady-a'n European football-a inlan nawn an tum thu a sawi - season hman zawh takah khan Wolves hi Premier League-ah pasarihna an ni a, European football an khel dawn lo.
Wolves player neih Matt Doherty, Ruben Neves, Raul Jimenez, Rui Patricio, Diogo Jota, Jonny, Romain Saiss, Joao Moutinho, Leander Dendoncker leh Adama Traore te en ila, top club-a regular tur ni lo mah se player ṭha pangngai tak vek an ni.
Season khat chu an la cham mai theih a rinawm a, mahse 2021-22 season-ah European football an khel lo nawn a nih erawh chuan kum upa lam pawhin sum tamna lam an hawi ang a, a naupang lamin European football khelh an châk dawn.
Heng zawng zawng pumpelh nan chuan Wolves-in bazar an ṭan a ngai tihna a ni a, Liverpool, Manchester United leh Juventus nena sawizawm, tun season-a goal 27 khungtu Jimenez chelh dan an ngaihtuah a ngai bawk ang.
Login to comment
No Comments