2025 aṭangin kum khatah board exam vawi hnih neih a ni tawh dawn

Sorkar laipui hnuaia Ministry of Education chuan kum 2025-2026 academic session aṭang chuan kum khata board exam vawi hnih buatsaih tum tura ruahmanna siam turin Central Board of Secondary Education (CBSE) a hriattir.

Ministry of education chuan semester system-a sikul kalpui tura rawtna chu a hnawl a, mahse, kum khata board exam vawi hnih buatsaih a nih theih nan hian sikul principal te nen thla thara inrawn khawmna neih an tum thu an sawi a ni. Education ministry chuan,"CBSE hnenah hian kum khata board exam vawi hnih buatsaih a nih theih dan tur chungchangah ruahmanna siam turin kan ngen tawh a, CBSE hian hma la nghalin, sikul principal-te nena inrawn khawmna pawh thla tharah hian neih tum a ni," tiin an tarlang.

Nikuma education ministry-in New Curriculum Framework (NCF) a tlangzarhah khan kum khata board exam vawi hnih buatsaih thei tura ruahmanna an siam mek thu hi an tarlang a, hei hi zirlaite'n an zilai ṭha zawka an zir theih nana hun tam zawk an neih nan leh result ṭha zawk nei tura an chet ṭhatna ber an thlan theih nan an ti a ni. CBSE hian kum khata board exam vawi hnih buatsaih a nih theih nan hian academic calendar siam ṭhatna tur an buaipui mek a, undergraduate zirlaite tana an admission tih leh tur tibuai lo tura ruahmanna siam tum a ni.