Manchester City tan Amex Stadium mangchhia?

Manchester City-in an khelh hmabak match ruk an chak vek chuan Premier League-ah a zawnin vawi li an champion dawn. Mahse, league table thlir chuan Pep Guardiola hote hian Arsenal chu point liin an pha lo.

Mikel Arteta hoten City pressure an pe ṭha a, zanin dar 12:30 hian Brighton & Hove Albion hmaah Man City fiahin an awm dawn. Amex Stadium-a Pep-a hote an lenluh hnuhnung pathumah chak, chak lo leh draw result a thleng vek a, City ṭantu tan mangchhia a thleng thei tlat.

A tak ram chu

Man City leh Brighton hi Premier League-ah vawi 14 an inkhel tawh a, City hi vawi 12 an chak - hei hi a tak ram chu a ni. Pep Guardiola hote hi chak tura ngaih a ni a, Amex Stadium-a match hnuhnung pathum lek ni loa an inkhelh tawhna zawng zawng thlir chuan Seagulls lakah record an nei ṭha.

Pep-a hote hian Real Madrid an hneh loh avangin UCL aṭangin an tla a, ni hnih pumhlum chauh an chawlh hnuah FA Cup semifinal-ah Chelsea hnehin final an lut. Tunah erawh City-in chawlhna hun an nei ṭha tawh a, kar khat tawp an hahdam tawh avangin Blues an hmachhawn ṭum aiin an ṭha tawh zawk dawn.

Chutihrualin Thawhlehni training-ah Erling Haaland leh Phil Foden te an tel lo a, Norwegian striker Haaland hi FA Cup semifinal-ah pawh a tel tawh lo. Haaland hian tun seaosn-ah goal 31 khung tawhin Foden-a'n goal 22 khung tawh bawkin, an tel lo a nih chuan City tan channa nasa tak a ni thei ang. Mahse, Julian Alvarez, Bernardo Silva, Jeremy Doku leh Kevin De Bruyne te an la awm tih hriat a ṭha.

Brighton lam hi

Roberto De Zerbi kaihruai Brighton hi Europa League-ah AS Roma hneh loin an tla a, Premier League-ah 10-naah awm mekin season tharah European competition-ah an tel a rinawm tawh loh. Brighton hian an player ṭha an chan tam avangin season liam ta ai kha chuan an nem tawh zawk.

Seagulls hian March 31 khan Liverpool 2-1 in an hneh lo a, tun thlaah phei chuan chak an la nei lo. Brentford leh Burnley nen an inhnehtawk a, an mualah Arsenal 3-0 ngawtin an hneh lo bawk. De Zerbi hote tan champion nomawi duha tuihal City chelh a har ang.