Arsenal mualah Chelsea

Premier League hmahruaitu Arsenal chuan zanin dar 12:30 hian Chelsea an mikhual dawn. Mikel Arteta naute hian EPL champion nih an duh takzet a nih chuan 'London Derby' a hnehna chan ngei hi a ngaiin a rinawm.

Gunners hian champion lai Manchester City lakah point khatin hma an hruai mek, match khatin an khel tam thung. Blues lakah point thum an hmu thei a nih chuan Citizens tan boruak danglam an siamsak ngei ang.

Match hnih an chetsual hnuah Arsenal hi an tho leh tawh a, inrintawkna sang tak nen Chelsea hi an lo mikhual thei dawn. Arteta chuan, "Chelsea hi kan hneh ngei a ngai, chumi tur chuan tunah hian kan ṭha tawk.

"Manchester City nena FA Cup semifinal an khel kha ka en a, team ṭha tak an ni tih pawh ka hria. Min ṭantu fans tam tak hmaah champion kan tum a ni tih hi a taka kan lantir a ngai dawn a ni," a ti.

Season hmasa khan Arsenal hi a tir lamah an che ṭha a, mahse match tawp lam pakua zinga pathumah chak hnehna an chang a, nomawi an beseina pawh a thamral - tun season chu thlen nawn tir loh ngei an tum ang.

Arteta chuan, "Kumin January thla aṭang kan khelh chhoh dan hi a makin a ropui hle. League hmahruaitu kan ni a, eng nge lo thleng dawn chu kan hre dawn a ni," a ti a, champion theih ngei a la inbeisei a ni.

North London club hian an player langsar zingah hliam an nei rih lo, coach Arteta-a'n a duh angin a naute a rem thei. League bak khelh tur an nei tawh lo a, champion turin an ṭha tawk em tih chu a takin kan hmu chho dawn.

Chelsea tan champion beisei chi a ni tawh lo a, a sang zual pali zingah pawh an tel a rinawm loh. European football hrim hrim erawh an la beisei thei, chumi tur chuan Arsenal hneh a ngai dawn thung.

FA Cup-ah Man City hneh loin semifinal-ah an zinkawng a tawp a, coach Mauricio Pochettino chuan insiamṭhat nghal an ngaih thu a sawi. Poch chuan, "A pawimawh ber chu hma lam pana kal zel hi a ni.

"Man City aṭang khan zir tur kan nei. Real Madrid an hneh loh kha na taka hliam an ni a, mahse a hnuah chuan ṭha takin an khel leh nghal thei, football-ah chuan lungngaia indawm kunna hun a awm lo," a ti.

Blues manager Pochettino tan tun season an hman chhiat thuam mawi dan a vang tawh a, league match an khelh hmabak te a ṭha thei anga bera hmachhawn a ni tawh ang, chumi bul ṭanna tur chu Arsenal an ni dawn - London Derby a hmuhnawm ang.