Liverpool beiseina a la thi lo e

Old Trafford-a Manchester United an inhnehtawkpui hnua ngai la awh leh hleithei lo Liverpool chuan champion an la tum ve reng tih an pholang a, Pathianni zan khan Premier League inkhelah Fulham chu 3-1 in an hneh.

Reds-in United an inhnehtawkpui chiah khan Premier League table-ah pahnihna an ni zui a, Anfield-ah Crystal Palace an ngam loh zui avangin pathumnaah an tla thla! Europa League quarterfinal-ah pawh an hneh tura ngaih Atalanta an ngam lo a, European football an thlah fel der.

Liverpool ṭantute tan chuan April thla chu 'thla duhawm lo' tia chhal mai awma mawi a ni a, mahse, an mangchhia aṭangin Reds hi an harh ṭan ve leh ta - Trent Alexander-Arnold, Ryan Gravenberch leh Diogo Jota ten goal khat ṭheuh an khung a, Fulham tana Timothy Castagne goal khungin awmzia a nei phak lo.

Inhnehtawk

Fulham khelmualah Liverpool-in inkhel thunun mah se, a pawimawh ber goal an khung thei lawk lo a, tun hnai an result avangin fans tam tak chuan an hlauthawng hman. Mahse, minute 32-naah Arnold a lo lang zawk a, thla hnih chuang hnua a vawi khat nana bul ṭan fullback hian mawi zetin freekick a chhuih lut.

Liverpool fan-ten hliam vanga rei tak a inlan theih tawh loh hnuah Arnold an hmu leh ta a, khualmualah an thawm a ring hle. Mahse, 1-0 a chawlhlawk hman an inbeisei laiin Liverpool beisei loh thil a thleng a, Fulham tan Timothy Castagne chuan si phurh a sut.

Fulham-in chawlhlawk hma lawka si phurh an sut avangin 1-1 in chawlhlawk hman a ni a, an goal khung hun hi a 'timing' hle. Liverpool fans erawhin hlauthawngin second half an thlir a, bench lama Mohamed Salah awm zanah an ngaih a ngam thei lo.

A hunah tak

Anfield-a team pahnih intawn hmasakin Reds hi 4-3 in an lo chak hram tawh a, chak turin minute 88-naa Arnold-a goal an mamawh. League Cup semifinal-ah pawh team pahnih hi intawngin, first leg-ah Reds hi 2-1 in chak mah se, second leg-ah 1-1 in an inhnehtawk.

Thawnthu hlui keu letin Liverpool fan-te hlauhthawnna belhchhahin a awm a, mahse, rei erawh an hlauthawng lo. Minute 53-naah Ryan Gravenberch chuan a theihna pholangin, mawi zetin hmahruaina goal a khung leh a, cup inelnaah Reds tan goal thum lo khung tawh mah se Premier League bikah chuan Liverpool tana a goal hmasa ber a ni.

A la tawp lo cheu - minute 72-naah Jota chuan an goal thumna a khung a, goal khung an harsat laia fan-ten an lam fo ṭhin Portuguese forward hian goal hmangin a dam chiang ṭan tih a pholang.

Champion kan duh

Liverpool boss Jurgen Klopp chuan, "Minute 80 chhung chu game ṭha tak kan khel. Mahse, first half tawp lam minute 10 kan tiṭha tawk lo a, second half kan tihṭhat tho avangin a zia erawh a zia viau e," a ti a, an result-ah a lawm.

Klopp chuan sawi zawmin, "Nomawi chawi tura inum zinga tel zel kan duh a, chu chu thil chiangsa a ni. Arsenal pawh an chak a, Manchester City pawh match khatin khel tlem mah se, an chak ve leh mai ang.

"A pawimawh ber chu kan chak zel a ni a, chu chu kan tum ang," a ti. Match nga chiah khelh tur awm tawhah Liverpool hian Nilaini zanah Merseyside derby an khel zui dawn a, an la hmachhawn tur zingah Tottenham Hotspur leh Aston Villa an tel bawk.