FA Cup final lut Man United an mualpho

Manchester United-in Championship club Coventry City lakah 3-0 a hma an hruai hnuin an sut zawhtir vek a, extra time-ah VAR puihnain an him hram. Minute 120 chhungin 3-3 a ni a, Eric Ten Hag-a hote hi penalty shootout-ah a vannei zawkah ṭangin final an lut - player tam zawkin chak pawh an lawm ngam lo!

Pathianni zan khan Wembley Stadium-ah FA Cup semifinal khelh a ni a, Man United-in Scott McTominay, Harry Maguire leh Bruno Fernandes te hmangin goal an khung hmasa a, Coventry-in Ellis Simms, Callum O'Hare leh Haji Wright te hmangin an sut zo vek. Extra time tawp hma hretin Vitor Torp-a'n Coventry chakna goal khungah an inngai a, VAR hmanga ennawn hnuah pawm a ni lo - Ten Hag-a hote an vannei.

Man United hian FA Cup final an lut mah se semifinal an khelh danah an mualpho. Nikum final-a an hneh loh Manchester City an hmachhawn dawn a, nomawi beisei kher lo a, final-a mualpho lo tur pawhin insiamṭhat viau an mamawh ang.

United an chungnung

Man United defender lai zingah Harry Maguire chiah a dam ṭha a, inhliam zingah Bournemouth laka mualpho Willy Kambwala a tel avangin Casemiro chu defence laiah a ding.

Wembley Stadium chanve a sen a, a chanve dang leh chu a pawl dal niin final thlir lawkna tur ang hialah a ngaih theih. Man United-in Championship club lakah an thiam zawk tih an lantir a, inkhelah an thunun.

Minute 23-naah Alejandro Garnacho cross chu awmna hmun tur taka awm McTominay chuan goal ruakah a khung. Maguire-a'n tlarhnunga chet ṭhat mai duh tawk loin injury time-ah corner aṭanga ball kal chu chiang zetin a tauh lut.

Second half-ah pawh Man United bawkin bul an ṭan ṭha a, minute 58-naa Bruno Fernandes ball pet chuan Coventry player a per zarah goal-ah a lut. Darkar khat chhung chu chak tur zawka ngaih Man United an khel ṭha zawk a, goal thum an khung bawk avangin an dinhmun a ṭha hle.

Sub fuh leh fuh lo

Goal thum an chhuah hnuah Coventry-in risk an la a, defender Joel Latieaudiere aiah striker Fabio Tavares an luhtir. Mark Robins-a'n player pathum ṭhawt a thlak a, a luhtir dang pahnih Victor Torp leh Luis Binks te pawh game kal hmang thlaktute zinga mi an ni.

Ten Hag erawhin first half-a chance ṭha hlahtu leh ball hloh hnem Marcus Rashford thlak loin player nung ṭha zawk Garnacho a thlak daih. Coventry midfielder khel ṭha Callum O'Hare ball pek chu substitute Tavares-a'n changin a cross ball chu Ellis Simms-a'n mawi zetin a pet goal. Simms hian tun season-ah goal 19 a khung tawh a, vanneih thil tih a ni lo.

Dutch manager Ten Hag-a'n rawlthar talent nei ṭha Kobbie Mainoo la chhuakin tawnhriat nei ṭha Christian Eriksen a dah lut a, pressure sanga tawnhriat dah luh hi a thu chuan fuh viau lang mah se a takah a dik lo. Coventry goal nawr a nat phah zel thung.

Championship club an vannei tel a, minute 79-naah O'Hare ball pet chuan Aaron Wan Bissaka perin mawi zetin goal-ah a kum lut. Man United an talbuai tawh a, hun khawhral vangin goalkeeper Andre Onana-a'n yellow card a hmu.

Coventry substitute Torp-a volley kawh zet chu Onana-a'n ṭha zetin a dang leh a, United an buai zel. Injury time-ah substitute Luis Binks-a cross let chuan Bissaka kut perin referee-in penalty a pe a, a kut a fuh viau avangin VAR pawhin thutlukna a thlak thei lo. Haji Wright-a'n chiang zetin a khung a, minute 90 chhungin 3-3 a ni. Man United an vannei zawk tawh hial.

VAR puihna chu

Extra time-ah Man United an chungnung zawk lo a, an club legend Roy Keane chuan, "Coventry kha Premier League club khelhin an khel a, Man United erawh Championship club khelin an khel," tiin a sawi a, a dikna chen a tam hle.

Coventry goal bawh a na zawk a, Wright-a'n Casemiro timualphoin chiang taka tlan pel te chuan inkhel kalhmang a sawifiah. Chutihrualin Bruno Fernandes-a'n kawhzetin crossbar a pet per a, chance dang ṭha bik erawh an nei meuh lo.

Championship club erawhin hun ṭha an nghah. Wright-a'n goalkeeper chauh a hmachhawn hnuah goal pawnah chiah a pet a, Simms-a pawhin kawh zetin crossbar a pet per a, ball per hi goal pawnah chiah a sawt. Minute 120-naah Wright-a cross chu Torp-a'n a tlawh lut a, Coventry-in chakna goal-ah ngaiin an lawm hle. Mahse, VAR hmanga ennawn hnuah Wright hi a offside, inch khat pawh a tling kher lo ang.

An vannei zel

Man United fan tamna lamah penalty an pet a, Casemiro-a'n pet hmasa berin Brazilian midfielder hian keeper a pass! Bradley Collins tan save harsa a ni lo. Mahse, United tana pettu dang Diogo Dalot, Christian Eriksen, Bruno Fernandes leh Rasmus Hojlund ten an khung vek.

Coventry erawh pahnihnaa pettu Vitor Torp-a'n chiang taka a pet goal hnuah player hmuhnawm O'Hare pet chu keeper Andre Onana-a'n a dansak. Captain Ben Sheaf-a'n a pet over leh bawk. Hojlund-a'n chakna goal hi a khung a, Danish striker lawmpui tura United player tlan phei pawh an awm lo.

Final an thlen avangin United an lawm a, Championship club laka an chak dan avangin an zak tel. Euro maktaduai 81 senga an lakluh Antony erawh a man phu khawpa ṭhaa a khelh phak loh bakah inkhelh zawhah Coventry player a ti el hram - a chet dan hian dem a hlawh hle.

Ten Hag hmalam?

Man United-in Ten Hag-a hnuaiah kum zawnin FA Cup final an lut a, record ṭha tak a ni. Chutihrualin inkhel hi club neitu Joel leh Avram Glazer bakah Sir Jim Ratcliffe leh technical director thar Jason Wilcox ten an thlir. Club thuneitute hi an lawm kher a rinawm loh.

Inkhelh banah Ten Hag chuan, "Kei chuan mualphonaah ka ngai lo a, hlawhtlinnaah ka ngai thung. Kum hnih chhungin final vawi hnih kan lut. Kum 10 liam taa Man United vanglai khan vawi thum chauh final an lut thei," tiin an hnathawh ropuina lai chu thiam takin a sawi lang thung.

Man United hmalam hun thlirin Sir Jim Ratcliffe chuan, "Fan-ten dawhtheihna an tlachham a, ka hriatthiampui. Mahse, kan zin kawng hi thlir ila, dawhtheih a ṭul. Switch anga vawi khat hmeha dik vek thei a ni lo," tiin a sawi.