Leverkusen an tlawm thei lo!

Josip Stanisic-a'n injury time-ah pawh minute sarihnaah a khung a, Bayer Leverkusen-in Borussia Dortmund lakah siphurh an sut hram. Xabi Alonso hote hi Bundesliga-ah champion tawh mah se tun season-ah hneh loh an tawng lo a, Signal Iduna Park-ah an huaisen rah sengin an record duhawm tak hi an chhunzawm.

Pathianni zan inkhelah hian Dortmund tan Niclas Fullkrug-a'n minute 81-naah a khung a, Leverkusen record duhawm hi tawp tura ngaih a ni. Mahse, an tlawm duh loh bakah an vanneih tel avangin match 45 chhung chu hneh loh an tawng tawh lo.

Bayern Munich aṭanga loan hmanga Leverkusen zawmtu Stanisic hian Florian Wirtz corner pet chu a tauh lut. Kar laihawla Europa League quarterfinal-ah pawh Leverkusen hian minute 89-naah Jeremie Frimpong hmangin West Ham lakah siphurh an sut tawh bawk.

Leverkusen hian Bundesliga-ah VfB Stuttgart, Eintracht Frankfurt, VfL Bochum leh Augburg te an la hmachhawn dawn. Europa League semifinal-ah AS Roma an hmachhawn dawn a, DFB Pokal final-ah FC Kaiserslautern nen nomawi an inchuh bawk ang. Alonso hote hi hneh loh nei loa treble champion thei dinhmunah an ding.