Tsitsipas hnehin Ruud a champion

Tennis inelna ngaihhlut zinga mi Barcelona Open chu Pathianni zan khan khelh zawh a ni a, he hmuna hlawhtlinna lo chang tawh ṭhin Stefanos Tsitsipas hnehin Casper Ruud a champion.

Seeded pathumna Ruud hian Greek tlangval lakah 7-5, 6-3 in hnehna a chang a, tennis a khelh hun chhunga nomawi a chawi hlut ber a hlawh chhuak - ATP 500 huangah hlawhtlinna a chang ta a ni.

Norwegian star Ruud chuan, "Ka tan chuan nomawi hlu ber a ni a, tun hmain ATP 5000 leh 1000 huangah final ka lut tawh ṭhin a, mahse a vanduai zawk ka ni leh mai ṭhin, tunah chuan ka hun a thleng ve ta," tiin a sawi.

Grand Slam inelna bikah pawh Ruud hian vawi thum ngawt final a lut tawh a, mahse tennis inelna lian leh ngaihhlut berah pawh hian a vanduai zawkah a ṭang zel.

Tun ṭum final-ah pawh hian set khatna tir lamah a service a hloh, mahse game ruknaah a khingpui service chhuhsak letin 6-5 a hma a hruai hnuah set point pahnihna a tihlawhtling.

Set hnihnaah erawh Ruud-a'n a tir lamah 4-1 in hma a hruai thei. Greek tlangval Tsitsipas hi match 10 chhung chak zawn thei ni mah se, tun ṭumah chuan darkar khat leh a chanve chhungin a tlawm zawkah a ṭang.

May thla chawhnu lamah clay court inelna lian French Open an khel dawn, chumi hmain Madrid Open leh Rome Open te an la khel dawn a, inelna lian atana inbuatsaihna a ni nghal ang.