PSG tan nomawi a hnai takzet ta

Paris Saint Germain chuan Pathianni zan khan Lyon 4-1 in an sawp a, Ligue 1 nomawi an kawl lai humhim turin an dinhmun an siamṭha leh tawh a, match nga khelh tur la awmah point nga an hmuh chuan an champion dawn.

Lyon midfielder Nemanja Matic-a'n anmahni lama a tih luh avangin PSG hian minute thumna lekah hma an hruai a, a hnuah Lopes Beraldo-a'n khung lehin Portugal striker Goncalo Ramos chuan goal hnih a khung belh bawk.

Paris khawpuia inkhelah mikhual Lyon tan Ernest Nuamah chuan goal khat khung ve mah se awmzia a nei tawh lo a, an tan season thara Champions League beiseina a thamral mek ve thung.

Luis Enrique naute hian an match lehpekahah table mawng lama talbuai lai Lorient an tum dawn. PSG hi an chak a, inkhel dangah AS Monaco chuan Lille lakah point thum an hlawh chhuak lo a nih chuan Paris club hi tun hnai season 12 chhunga a vawi 10 nan Ligue 1 champion an ni ang.