Barca ngamtu Real-in La Liga nomawi an chawi dawn?

Real Madrid tan, "La Liga nomawi chu bel chhunga sa" tia sawi ngam hial a ni ta - Pathianni zan khan El Clasico-ah Real hian 3-2 in Barcelona an hneh a, league table chung ber luahtu an nihna chu an sawh nghet.

Santiago Bernabeu-a inkhel hmuhnawm bikah El Clasico atana duhthusam chu a thleng vek tia sawi theih hial khawpa mawiin team pahnihin inkhel hmuhnawm an chhawpchhuak a, ennawm puan zar khar a nih meuh chuan lunghnur takin Barca an haw.

Barcelona-in Andres Christensen leh Fermin Lopez hmangin vawi hnih ngawt hma an hruai a, Real hian Vinicius Jr (penalty) leh Lucas Vazquez hmangin si phurh an sut zo - hun pek belhah Jude Bellingham chuan chakna goal a khung zui a, Barca beiseina a tawp.

Real hian match 32 aṭangin point 81 an hmu ta a, point 11-in Barca an tlansan bawk. Carlo Ancelotti nauten nomawi an chawi chiang tawh, tiin a sawi theih a, Xavi leh a naute tan nomawi humhim tur chuan thil mak a thlen tel a ngai tawh.

Bernabeu a reh

Inkhel ṭan aṭanga minute rukna lekah Barca-in goal an khung nghal a, Raphinha corner pet aṭanga ball kal chu Andres Christensen chuan chiang zetin a tauh lut a, Santiago Bernabeu thawm chu reh tak a ni.

Barca hlim chhung erawh a rei lo hle. Kum 17 mi centre back Pau Cubarsí a chesual a, Vazquez laka a foul avangin Barca defender ṭhangduang hian penalty a chawi - a pettu Vinicius-a'n goal a chantir turin harsatna a nei lo a, minute 18-naah 1-1 a ni chiah.

Catalan club tan Lamine Yamal chuan hmahruaina goal a khungah a inngai a, mahse, minute 28-naa thil thleng hi referee chuan goal-ah a pawm lo a, Barca an vanduai takzet.

Kum 16 mi Yamal hian corner aṭanga ball kal chu a khungah a inngai a, goal line hnunga awm Real goalkeeper Andriy Lunin chuan ball hi a lo dang. Mahse, La Liga-in goal line technology an hmang lo a, video assistant referee chuan 'goal lo' tiin thutlukna a siam.

Boruak a sang

Goal dang lut loin chawlhlawk hman a ni a, second half-ah Barca bawk an inlar hmasa - minute 69-naah Yamal-a shot chu Lunin-a'n dang mah se, a per lehlam chuan Fermin Lopez per ve leh chhawngin, goal-ah a lut.

Kum 20 mi Fermin Lopez hian goal a khung rualin Real Madrid fans lam a pan a, Real thiampuipa Jude Bellingham-a tihdan zir chungin a goal khung a lawm - Real fan-te tan chuan a 'na' thlawt.

Mahse, Lopez a phur sual a, minute li hnu lawkah goal an chhuah ve leh. Ven loha awm Vazquez chuan ngaihthah chi a ni lo tih pholangin, Vinicius-a siamsak chu goal-ah a chantir a, 2-2 a ni.

Barca fan-ten chak tura an inngaih tawh hnuah goal an chhuah leh a, inkhel boruak sanga dinhmun ṭha zawka din hnua chetsual leh ṭhin pawizia a takin an tem.

A hunah Bellingham

Real tan Bellingham a inlar nawn - team pahnih an inhnehtawk tawh mai dawn niin a lang hman a, mahse, hun pek belh minute khatnaah English midfielder a inlar a, Vázquez-a siamsak chu chiang zetin goal-ah a chantir.

Barca an hawihai a, an ngam loh hnu Bellingham bawk an ngam lo nawn. Tun season La Liga-a team pahnih intawn hmasakah khan Bellingham hian Real tan goal hnih a lo khung tawh a, 2-1 in Madrid khaw club hi hnehna a chanpui.

Kum 2007-a Ruud van Nistelrooy hnua La Liga bika El Clasico-a match hmasa pahniha goal khung thei hmasa ber a ni a, nipui transfer-a Real-in a man atana pound maktaduai 88.5 an sen kha a awmzia a lang nawn zel.

Zinedine Zidane-a hak ṭhin jersey number 5 ngat an haktir Bellingham hian Real tan tun season-ah league goal 17 zet a khung ta a, goal khatin Girona forward Artem Dovbyk chiah a phak lo tawh.

A zahthlak

Yamal-a goal khung pawmsak an ni lo a, Barca-in hei hi pai dam harsa an ti. Barcelona coach Xavi chuan, "A zahthlak takzet. Khawvela league ṭha ber nih kan duh chuan technology lamah pawh hma kan sawn a ngai a ni," a ti.

La Liga-ah goal line technology hman a nih miau loh avangin Yamal-a goal khung leh khung loh teh nan VAR hman a ṭul a, VAR hian goal lo anga a tih bawk avangin Xavi a lawm thei lo.

Barcelona goalkeeper Marc-Andre ter Stegen chuan, "Football tan thil zahthlak a ni a, sawi ngaihna pawh ka hre lo. Sum tam tak a awm a, thil pawimawh tan a awm leh si lo," a ti a, goal line technology hman a la ni ve lo chu a hrethiam lo.

Hetihlai hian Atletico Madrid chu rin loh takin Alaves khelmualah 2-0 in an mualpho a, Carlos Benavidez leh Luis Rioja goal khung chu a chhanletna tur an nei lo. Atletico hi table-ah palina la ni reng mah se, pangana Athletic Bilbao aiin point thum chauhin an sang tawh.