CYMA Cricket 2024 fixtures a chhuak ta

CYMA leh Cricket Association of Mizoram ṭangkawpin an buatsaih 12th Inter Branch YMA Cricket Tournament 2024 vuak hawnna chu nizan khan Bawngkawn South YMA Auditorium-ah neih a ni a, Central YMA vice president Prof. Lalnuntluanga'n inelna a vaw hawng.

Inelnaah hian branch 49 an tel a, CAM president Lalrochuanga Pachuau-in fixtures a tlangzarh. CYMA Cricket-a champion tawh Armed Veng, Chanmari, Ramhlun Venglai leh Durtlang te chu first round khelh ngai loin second round an lut vek a, group hran veka dah an ni bawk.

Inelna hi Ramhlun Sports Complex, Joint YMA Field leh Mualpuia khelh a ni dawn a, first round hi April 24, Nilaini aṭanga khelh ṭan tur niin April 27, Inrinniah khelh zawh a ni ang. Hemi ni vek hian team 32 telna second round khelh ṭan tur a ni.

Round of 16 (Pool final) hi May 1, Nilaini aṭangin khelh ṭan a ni dawn. Quarterfinal hi May 6-7, 2024-a khelh turin ruahman a ni. Hetah hian fixtures hi pawh ṭhat leh tur a nih avangin eng team pawh an inhmachawn thei ang.

Inelna hnuhnung pathum final-ah Ramhlun Venglai leh Durtlang an inhmachhawn vek a, cricket khel thiam branch pahnih pawh hi quarterfinal-ah an inhmachhawn thei dawn tihna a ni.

Inelnaah hian Ramhlun Venglai hi champion ngun ber niin vawi nga an champion tawh a, Chanmari vawi li champion tawhin Durtlang leh Armed Veng te vawi khat ve ve an champion tawh bawk.