Pro Volleyball kan nghak chhuak ta; Thutak Nunpuitu Team vs Hunthar

Tualchhung volleyball inelna lian leh ngaihhlut hlawh ber Ather Pro Volleyball League chu zanin dar 8:00 hian khelh ṭan a ni leh dawn ta, match hmasa berah champion lai Thutak Nunpuitu Team (TNT) leh Hunthar te an inhmachhawn dawn, inkhel a hmuhnawm nghal ang.

Inelna hi LPS Arena, Falkland-ah neih a ni dawn a, inelna ṭan zan hian en man a awm dawn lo - zan dangah en man Rs 50 a ni thung ang. LPS 1-ah live hmanga pek chhuak a ni dawn a, tun dinhmunah chuan YouTube leh social media dangah tih chhuah a ni dawn rih lo.

PVL neih tirh aṭangin TNT leh Hunthar te hi an la inlan char char a, anni pahnih chiah hi PVL khel kim thei an ni. Ṭantu mipui an nei ṭha ṭhin a, tun season atana a khuh hawngtu an ni pawh hi an inhmeh hle, a tir aṭangin boruak a nung nghal hle dawn tihna a ni.

Mizo hlang TNT

Pro Volleyball League-ah hian Mizoram pawn lam player chah luh phal a ni ṭhin a, chung mite chuan nasa takin danglamna an thlen ṭhin. Season hmasa kha TNT hi Mizo hlangin an khel a, an champion hial - hetiang ti thei hmasa ber hi an ni bawk. Kuminah pawh tualchhung player hlangin an khel leh dawn.

An champion theih nana player pawimawh Vanlalṭanchhana (Valbuanga) chu damlohnain tlakbuak mah se inkhel turin a inpeih leh tawh. Valbuanga chuan, "Ka dam ṭha tawh a, kuminah hian champion leh ngei tumin theihtawp kan chhuah dawn," tiin Vanglaini a hrilh a, a inringtawk hle.

Kawnpui tlangval Valbuanga chauh hi TNT innghahna erawh a ni lo. Captain Vanlalchhantluanga Sailo hoin Sadrak Fanai, Laldinchhunga, K. Zodingliana leh an ṭhiante chuan coach Lalhmangaihsanga Sailo kaihhruaina in an nomawi humhim an tum dawn.

TNT hi champion lai ni mah se ngaihṭha taka awm a rem dawn lo, season hmasa final-ah khan an hnufual zawk hnuah Hunthar hi an lehthal thei leh hlauh a ni a, chuvangin an tan hneh sa anga zuam ngawt chi a ni dawn lo a, fimkhur taka an khelh a ngai dawn a ni.

Hunthar an zam lo

Nikum khan a vawi thum nan Hunthar hian champion an tum a, mahse TNT lakah an ṭang tlang zo ta lo. Kuminah hian coach VL Malsawma Renthlei leh a naute hian champion an tum ngam a, tualchhung player ṭha bakah Anurag Rawat an neih belh avangin beisei an nei sang.

Anurag hi PVL-ah a mikhual lo, season hmasa khan Tuipuiral tan a khel tawh, match khata point 30 bawr zet hlap chhuak thei a nih kha! TNT lam tan Delhi tlangval 6ft 5in zeta sang hi a danchah dan tur ngaihtuah chhuah a ngai ngei ang a, hna a hautak dawn hle a ni.

Hunthar coach Sawma Renthlei chuan, "Nikum aiin kan inbuatsaihna a ṭha zawk, tualchhung player hrim hrim thlir chuan kan langsar lo zawk pawh a ni mai thei, mahse inbuatsaihna a ṭhat avangin beisei pawh kan nei sang hle," tiin an inpeih thu Vanglaini a hrilh.

Tualchhung volleyball sawi chuan Hunthar nen hian a inzawm tlat a, tun ṭumah pawh hian an veng mi player panga an nei dawn a, coaching staff pawh Hunthar mi vek an ni ang. An ṭhat tawk loh deuhna lai thuam chak turin veng pawn mi an la bawk a, team hmuhnawm leh ṭan hlawh an ni leh ngei ang.

Mizoramin kumina Nagaland-a neih 3rd NorthEast Olympic Games-ah volleyball inelnaah chiang takin gold medal an la a, hei hian tualchhung volleyball level sanzia a pholang.