Vanglaini - Real Madrid-in Badiashile an duh

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Real Madrid-in Badiashile an duh

Spanish champion Real Madrid chuan AS Monaco rawlthar duhawm Benoit Badiashile an hel nia sawi a ni a, Zinedine Zidane-a enkawl team hian pound maktaduai 35-in French defender hi an ngam nia sawi a ni.

Kum 19 mi defender hian coronavirus vanga league tihtawp a nih hma khan Monaco tan French football-ah match 16-a khel hman a, Zidane mit a tlung hle niin an sawi.

Khawthlang media ten an tarlan dan chuan Real president Florentino Perez chuan coach Zidane-a hnenah player manto leina tur an nei lo tih a hrilh a, French coach hian rawlthar footballer lam a zawng.

Badiashile hian December khan kum 2024 thleng Monaco tana khel turin contract thar a ziak a, mahse Real Madrid hian lakluh an tum tak tak a nih chuan hnar a harsat ang.

Real hian tlarhnung laia ding turin Sergio Ramos, Raphael Varane, Eder Militao leh Nacho Fernandez an nei mek a, Nacho hi a chhuak dawn nia sawi a awm bawk - 'The Next Varane' tia hminglem an pek Badiashile lam an hawi hi a mak hran lo.

Share this Post

Login to comment

No Comments