Magpies hi Saudi Arabia Public Investment Fund, PCP Capital Partners leh Reuben Brothers ṭangkawp chuan lei an tum a, English club hi pound maktaduai 300-a lei turin inremna an neihpui.
Mahse, club hi duh angin awlsam taka lei ngawt theih a ni lo - Premier League lamin an pawmpui ve phawt a ngai a, English top flight lama thuneitute hian hun an duh rei deuh avangin Saudi PIF lam hi an inhnukdawk.
Saudi PIF hausakna hi dollar tluklehdingawn 300 a chuang a, heng zawng zawng ngaihtuah hian khawvela team ṭha ber pawl din tur angin an lang hman - tunah erawh thawnthu mai a chang ta.
Kan lawm e
Saudi PIF-in Magpies an lei theihna tura hma latu leh tha thawhhlawk tak Amanda Staveley chuan Newcastle fan-te hnenah ngaihdam a dil a, "A pawi takzet a ni. Fan-te kan tawrhpui a, mi an thlawpna zawng zawngah lawmthu ka sawi bawk a ni," a ti.
Hetihrual hian Magpies lei tumtu te chuan thuchhuah siamin, "Newcastle-in hma a sawn zel theih nana hmalak duhtu kan ni a, nakin hun thlengin thui tak kan thlir. Khawvelin harsatna tam tak a tawh karah pawh club ṭantute leh a chhungkua ngaihtuah reng chungin hma kan la.
"Amaherawhchu kan beisei lawk loh anga rei tak thil a kal takah chuan keini leh club inremna pawh kalpui zel chi a ni ta lo a ni," an ti a, an inhnuhdawh chhan an puang.
Newcastle fan-te tan lawmna tur erawh a la awm tho mai thei - American sumdawng hausa Henry Mauriss chuan Magpies hi pound maktaduai 350-a lei a inhuam nia sawi a ni a, ClearTV neitu hausakna hi puanzar ni lo mah se pound tluklehdingawn nga chu nei tling tura ngaih a ni.
A rei lua e
Premier League hian dodalna tam tak karah Saudi PIF-in an league-a club neih an tumna chu awlsam taka pawm mai an duh lo a, Saudi sorkar leh PIF inzawm dan tak hi hriatchian an duh.
PIF chairman hi Saudi Prince Mohammed bin Salman a ni a, Premier League dan hre mite chuan an chhui uluk viau chungin Newcastle lei tuma intelkhawm pawl leh Saudi sorkar inlaichinna hi chiang takin a hmawr an bawk thei lo.
Mahse, Premier League danah engkim hriatchian a ngai tlat si - club chhunga thuneitu ber tur, an pawisa hmuhna tur leh club board ruattu tur te chu hriat a ngai. Saudi PIF, PCP Capital Partners leh Reuben Brothers hi club leitu chu an ni ngei ang a, PIF aṭanga Magpies enkawl tur ber hi a chiang ta lo a ni.
He tah tak hian Premier League-a buai a, Newcastle-a thuneitu ber tur hi a hre thei lo. PIF leh Saudi sorkar inlaichinna hriat theih a ni lo a, Magpies-a hotu ber tur hriat a harsa a, Premier League-in inngaihtuah nan hun a hmang rei hi a mak lo.
Sawiselna chu
Kum 2018-a thah, Saudi journalist lar Jamal Khashoggi-a kawppui Hatice Cengiz chuan Saudi sorkar inrawlhna PIF-in Magpies lei an tum hi na takin a lo dodal tawh a, Jamal hi PIF chairman Mohammed bin Salman-a thah tir niah a ngai a ni.
Cengiz chuan, "Saudi rama thuneitute hian an hausakna hmangin mihring dikna chanvo an rah beh hi an thup thei chuang lo ang tih lo hriat phah se, Jamal-a that tute pawh thup bo theih an ni lo ang. Jamal-a'n a phu ang ngeia rorelna dik a hmuh hma chu kan chawl dawn lo," a ti.
Mihring dikna chanvo humhalhtu pawl Amnesty International UK economic affairs programme director Peter Frankental chuan Magpies lei tumna chu Saudi sorkarin a thil tihsual thupmawi a tumna a nih thu a sawi a, PIF-in Magpies an lei thei lo chu Saudi rama mihring dikna chanvo humhalh tura hnathawktute tan hnehna a nih thu a sawi.
June khan Premier League chief executive Richard Masters chuan Saudi PIF-in Magpies lei an tumna dodalna nasa tak chu uluk taka an ngaihtuah tur thu a lo sawi tawh a, Saudi sorkar chu dan lo anga an rama Premier League pe chhuaktu TV network beoutQ humah puh an ni bawk - middle east lama PL official broadcaster beIN Sport chuan Premier League hnenah hemi chungchang hi an lo thlen tawh a ni.
A na a ni
Magpies fan-ten Arab oil mawm hmanga hausak 've' an tumna chu a thamral ta a, an rilru a dam thei lo. Newcastle United Supporters' Trust zinga mi Greg Tomlinson chuan, "Premier League aṭangin chhanna kan beisei a ni," a ti a, a lungawi lo hle.
Newcastle ṭantute hian dodalna tam tak a awm chungin an club hralh hi an thlawp a, Newcastle United Supporters' Trust hoin vote an thlak aṭanga a lan danin fans 97% zet chuan an club hralh hi an duh.
Magpies neitu Mike Ashley hausakna hi pound tluklehdingawn 1.97 bawr vel a ni a, a sum neih zat ngaihtuah chuan Newcastle hi Premier League club lian pawl ni thei an ni - mahse, kum 2007-a Magpies a lei hnuah Ashley hian fan-te beisei angin sum a hmang tawk lo a, chhuak tura duhtu an tam hle.
Newcastle MP Chi Onwurah chuan, "Newcastle lei tumna a tlawlh leh tak avang hian mi tam tak chu an hnual ang tih ka ring a, Premier League hnenah an hun duh rei chhan leh fan-te hmaa insawifiahna awm tawk lo chu a chhan zawtin lehkha ka thawn dawn a ni," tiin twitter lamah a ziak.
Login to comment
No Comments