Ansari-an Mallya banna pawmsak ta

Rajya Sabha Chairman Hamid Ansari chuan Vijay Mallya-an Rajya Sabha member a nihna aṭanga banna lehkha a thehluh hmasakah a signature a awm loh avangin a hnawlsak a, mahse Mallya hian lehkha hi thehlut ṭha lehin Nilaini khan a banna hi a pawmsak ta. Hemi ni vek hian Rajya Sabha Ethics Committee chuan House-ah Mallya member nihna hlihsak an rawtna chu an pharh ve bawk.

Leiba ngah avanga buaina tawk mek, Vijay Mallya hian London
aṭangin Rajya Sabha chairman hnenah banna lehkha hi a thawn a, mahse a thawn hmasakah hian a kalphung tur duan ang ni loa a ziah avang leh, a signature a awm loh avangin a pawmsak lo a, hei hi hriattir a nih hnuah a ziak ṭha leh a ni.

Ethics Committee chuan Mallya member nihna hlihsak tura an rawtna chungchang hi sawichhuakin, hei hian mipuite rilruah Parliament chuan member dik lote chungah a ṭul anga hma a lak zel thu leh, Parliament zahawmna humhim tura theihtawp a chhuah zel tur thu a hriattir dawn a ni, a ti.