AgustaWestland : Antony-an action la turin sorkar phut

Defence Minister hlui AK Antony chuan AgustaWestland chopper deal buaina chungchangah, sorkar laipui chu Congress hruaitu inhnamhnawiha puha vau leh blackmail ringawt loin, dik lo taka thilti an finfiahte lakah chuan action la mai turin a ti.

VVIP chopper deal hi Congress kaihhruai UPA sorkar laia siam a ni a, mahse thil dik lo a awm tih hriatchhuah a nih hnuah UPA sorkar chuan inremna an siam tawh chu a cancel a ni. Antony chuan UPA sorkarin tihsual a neih loh thu a sawi a, a hmaa Prime Minister hlui Atal Bihari Vajpayee kaihhruai NDA sorkar leh VVIP helicopter leina tura tehkhawng an siamte chu a thlak danglam zawk a ni, a ti.

Rajya Sabha-a AgustaWestland deal chungchang sawihonaah he thu hi sawiin, Antony chuan, "He thilah hian mipuite rilruah Congress hruaitute rinhlelhna tuh tum suh u, in hlawhtling lo ang. Politics lama her luh in tum a nih chuan in la inchhir zawk dawn a ni. Congress hruaitu in puhnate hi a finfiahna in nei a nih chuan vau leh blackmail kual lo hian an chungah action chu la mai rawh u" a ti.

Defence Minister a nih lai, kum 2013, February 14-a Press Information Bureau (PIB)-in inremna siam chungchanga thil dik lo awm nia hriat, Ministry of Defence hmalak dan official release a chhuah chhawn leh pawh a chhiar chhuak nghal bawk. Antony chuan," He inremna siamah hian eirukna lian tham tak a awm ngei tih chu zep rual loha chiang a ni. Italy lamah pawh hei hi chhui a ni tawh. Dan anga hmalak ngaihnate chu tihfel vek a ni tawh a, tunah chuan a taka inchet a ngai tawh a ni" tiin a sawi.

VVIP chopper deal buaina chu hlawhlting taka chhui ngei turin sorkar laipui chu a ngen a, he thubuai hi chak taka kalpui a ngai a ni, a ti. Inremna siam a nih theihna atana thamna petu company leh thamna pawisa dawngtute chu hrem ngei turin sorkar a ngen bawk.

AgutaWestland deal buaina kal zelah hian Air Chief Marshal hlui, SP Tyagi chu Central Bureau of Investigation (CBI) chuan Nilaini kha a ni thumna atan thu a zawtfiah leh. Agency hian Air Force official hlui, Air Marshal NV Tyagi pawh an ko bawk a ni.

CBI chuan Ministry of External Affairs hnenah ngenna thawnin, ram pasarih hnena Letters Rogatory thawna chanchin kimchang lakkhawmna kawnga pui turin a ngen. CBI official pakhat chuan Italy hnen aṭang chuan an hriat duh chanchinte kimchang taka hriattir an nih tawh thu a sawi.

Indian Air Force hotu-a SP Tyagi a awm laiin inremna hi siam a ni a, Tyagi hi inremna siam a nih theihna atana helicopter thlawh theih chin meter 6,000-a bithliah chu meter 4,500-a tihniamah puh a ni bawk.