Vanglaini - Dortmund captain Reus a inhliam

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Dortmund captain Reus a inhliam

Germany international Marco Reus chu hliam vangin a chawlh chin tur a hriat loh. Borussia Dortmund chuan season thar atana training chu Ningani khan an ṭan a, Reus hian inhliamna thar a neih thu an puang.

Kum 31 mi Reus hi ṭhal hliam vangin February thla khan a chawl a, tun thlengin a la inlan leh lo. Dortmund captain hi a dam chho ṭan mah se a ṭhal bawr ti hrawl inthlunna tha/duar a tihliam.

Borussia Dortmund chuan, "Marco Reus hliam vangin a la training thei lo. Captain hi hliam a neihna sa ṭhal bawrah hliam a tuar nawn a, a chawlh hun tur a la hriat theih loh," tiin thuchhuah an siam.

Dortmund hian Bundesliga-ah pahnihna nichungin season an khar a, Bayern Munich chu a zawna a vawi riat nan an champion. Ruhr valley club champion hnuhnun ber chu kum 2012 daih tawh kha a ni a, Jurgen Klopp-a kaihhruaina hnuaiah nomawi an chawi.

Kum 31 mi Reus-a'n Dortmund a zawm hnuah Bundesliga nomawi an la chawi lo a, hliam vangin a theihna angin a khel chhuak thei lo. Germany-in 2014 World Cup an champion khan Reus hi hliam vangin a tel ve lo.

Kum 2016 chinah ringawt pawh Reus hi vawi 13 zet a inhliam tawh a, match 85 zet a awl phah. Bundesliga season thar hi September 18-ah ṭan tur a ni a, Reus hian season bul a ṭan a rinawm loh zawk.

Share this Post

Login to comment

No Comments