Championship Playoff semifinal hnuhnung zawkah Cardiff City-in Fulham 2-1 in hneh mah se aggregate-ah Scott Parker hote 3-2 in an chak hram. July 3, Thawhlehni zanah Playoff final khelh a ni dawn a, Wembley Stadium-ah Brentford leh Fulham ten Premier League khel tur an zawng ang.

Craven Cottage-ah Cardiff City beiseina siam turin Curtis Nelson-a'n minute riatna lekah goal a khung a, Fulham-in Neeskens Kebano hmangin an sut nghal. Second half ṭantirhah Cardiff tan Lee Tomlin-a'n a khung leh a, hun tawp thlengin inkhel boruak a sang mah se Fulham an ṭangtluan hram.

Fulham dinhmun a ṭha

Cardiff City mualah first leg khelh a ni a, mikhual Fulham-in Josh Onomah leh Neeskens Kebano te hmangin 2-0 in hnehna an chang. Scott Parker-a hote dinhmun a ṭha a, inkhelh banah Fulham-in an chak an lawm chiam.

Cardiff City boss Neil Harris chuan, "Fulham-in Wembley Stadium thleng tawh ang maiin an chak an lawm," tiin an khingpuite chu lawm hma hretah a ngai a, second leg-ah lehthal ngei a tum. Fulham manager Parker erawhin Harris-a thil hmuh ang hi a thil thlen dan a nih loh thu a sawi a, khelmual pawnah boruak a la nung ṭha hle.

Beiseina neitu Cardiff

Cardiff City-in Neil Warnock hoin season bul an ṭan a, result an nei ṭha tawk lo. November thlaah Cardiff hi 14-naah an awm a, result ṭhat loh avangin Warnock an ban. Manager tawnhriat nei ṭha thlak nan Millwall legend Neil Harris an lalut a, kum 43 mi chauh a ni.

Harris hnuaiah Cardiff City an che ṭha chho a, season tawp match hnuhnung pathumah a zawnin an chak. November thlaa 14-na khan 5-na niin season an khar a, playoff khel turin an tling. Cardiff hian hun harsa an paltlang avangin first leg-ah 2-0 in chak lo mah se beiseina an la nei tho.

Boruak a sang

Craven Cottage-a khelh ni mah se entu an awm miau loh avangin 'home advantage' a tam lo. Mikhual Cardiff City-in minute 8-na lekah corner kick aṭanga ball kal chu Curtis Nelson-a'n a tauh lut a, inkhel boruak a dang nghal vek.

Fulham tan first leg-a goal khungtu Neeskens Kebano bawk a che ṭha a, French forward hian minute 9-naah Bobby Decordova-Reid cross chu a ke ding lamin ṭha zetin a khung. First half-ah goal dang a luh belh lo a, amaherawhchu second half ṭantirhah kum 31 mi Lee Tomlin-a'n ṭha zetin a volley lut a, Cardiff City-in beiseina thar an neih phah bawk.

Inkhel boruak a sang a, Fulham keeper Marek Rodak leh Cardiff keeper Alex Smithies ten hna an ngah malh malh hle. Hun tawp hnaihah substitute Nathaniel Mendez-Laing hmangin Cardiff-in Fulham tlarhnung an ṭhawng a, Tomlin-a volley ṭha zet chu Fulham keeper Rodak-a'n a dang.

Cardiff City-in 2-1 in hnehna an chang a, amaherawhchu first leg-ah 2-0 a an chak loh avangin aggregate-ah Fulham 3-2 in an chak.

Eng nge an sawi?

Fulham boss Scott Parker chuan, "Cardiff City kha ramsa hliam ang mai an ni a, first leg-ah 2-0 a an chak loh avangin hlauh nei loin an rawn khel. Engkim mai kha a harsa a, inkhelh chhung zawng kha kan hlauthawng a ni. Chutihrualin final kan thleng theih avangin ka naute ka chhuang a, team thawhrah a ni," tiin a sawi.

Cardiff boss Neil Harris chuan, "Final kan thlen loh avangin ka rilru a na hle. Beiseina neiin second leg kan khel a, amaherawhchu kan beisei ang a thleng ta lo. Hun tawp thlengin beiseina kan nei a, kan vanduai a ni. Player-te khelh danah erawh ka lawm em em a, season ṭha tak kan hmang a ni," tiin a sawi.

---

Share this Post