CoC vangin Supercell an hlawk

Finland khawpui, Helsinki-a mi, Supercell hian mobile game pathum chauh an siam a, chuta ṭang an sum hmuhchhuah chu a namen lo hle a, nikum chhung khan an game pathum siam aṭangin USD mtd 964 zet hlep an nei. An game hlawkpui ber chu Clash of Clans a ni.

Clash of Clans hi kum 2012 August aṭanga an tihchhuah a ni a, hei hi Supercell chuan a hlawhtlinpui hle a, kum 2015 chhung khan game hrang hrang sum lalut hnem tarlan zingah pakhatna te, pahnihna te a hauh a ni. Nikum chhung khan Supercell hian USD tluklehdingawn 2.326 zet a hmu tling a, heng aṭanga a hlep zawng zawng chu USD mtd 964 a ni. Kum 2014 chhunga a sum hmuh zawng zawng kha USD tld 1.777 a ni. Chawhrualin Clash of Clans game bik hian ni tin USD 827,771 zet hmuchhuak ziah ang a ni.

Supercell-a shar nei pakhat hnenah USD 15.50 zel a pe a, share nei zawng zawng hnena a sum pek chhuah hi USD mtd 699 zet a ni. Supercell hi company lian tak a ni lo a, thawktu 180 vel chauh an awm a, hma a sawn zel a, a lian zel.

Kum 2016 pawh hi Supercell tan chuan kum ropui a nih leh hmel a, an game siam thar Clash Royale chu US-a Apple app store-a download hnem ber a nih mai bakah sum lalut hnem ber a ni bawk. He game hi tunah hian ram 44-ah te khelh theih a ni. Supercell-in an tarlan danin an game siamte hi ni tin mi maktaduai 100 ten an hmang ziah a, an khel ziah a ni.

Supercell hi an din tirh chuan sum an nei vak lo ve hle a, Finland sorkar aṭangin Euro 400,000 an puk a, tunah chuan an sum puk hi an pe hneh vet vet tawh lutuk mai bakah, Finland sorkarah chhiah tam tham tak an chhunglut thei tawh zawk a ni.