FIFA President thubuai an siamsak

Football khawvela thuneitu sang ber FIFA-in chanchin duhawm lo an nei leh ta a, president Gianni Infantino chu FIFA hmunpui awmna Zurich, Switzerland-a thuneituten thubuai siamsakin an chhui zui nghal.

Kum 2016-a FIFA President ni tura thlan tlin Infantino hian FIFA eiruk thubuai ngaihtuahtu Swiss attorney general Michael Lauber chu a rukin a hmu nia sawi a ni a, hemi chungchangah hian chhui a ni dawn ta a ni. 

Infantino chuan FIFA kaltlanga thuchhuah siam nghalin, "FIFA hruaitu dinhmun ka luah ni aṭang khan he pawla eirukna leh hlemhletna lo awm tawh chhuitute puih hi ka thil tum lian ber a ni a, FIFA official tam takin khawvel hmun hrang hrangah he hmalakna behchhan hian dan hremi leh a chhuitute an lo hmu fo tawh a ni," a ti a, Lauber a hmuh chu thil dik lo tih tumna ni loin hnu chhuina kawnga puih a tum vang a nih thu a sawi. 

June thla khan Infantino hian Switzerland attorney general hmuh hi thil sual a nih loh thu leh, dan phal thlap a nih thu a lo sawi tawh a, hemi ṭuma a thusawi hi FIFA chuan tharthawh lehin an tarlang bawk. 

Infantino leh Lauber-te inhmuh ruk chungchangah hian special prosecutor Stefan Keller chu June thla khan he thil thleng chhui tur hian ruat a lo ni tawh a, Thawhlehni khan Lauber hian banna a thehlut nghe nghe - dan angin thawk tlang se August 31 thleng office luah tur a ni. 

Office of the Attorney General (OAG) chet vel dan chhuichiangtu chuan Lauber-a chet dan chu dan bawhchhiatna lian tak a nih thu an sawi a, a ṭul a nih chuan parliamentary committee hmaah insawifiah tura koh a nih tur thu an sawi bawk. 



Share this Post

Login to comment
No Comments