Juve U23 enkawl tur Pirlo

Serie A champion Juventus chuan an midfielder pawimawh ni ṭhin Andrea Pirlo chu an club Under-23 team enkawl turin an ruat a, Italy legend tan coaching lama a hun hmanna hmasa ber tur a ni ang. 

Kum 41 mi ni ve tawh Pirlo hian kum 2017 khan Major League Soccer club New York City aṭangin a football career a mangṭha a, August 2019 khan UEFA Pro Licence nei turin Coverciano (Italy national team technical headquarters)-ah a inziak lut a ni. 

Player a nih laiin Juventus tan hian season li a khel hman a, match 164-ah goal 19-a khungsak. Juve-a pan hma hian AC Milan tan season 10-a khel hman a, Milan tan hian Serie A (2), Coppa Italia (2), Supercoppa Italiana (1), Champions League (2), UEFA Super Cup (2) leh FIFA Club World Cup (1) nomawi a chawi hman. 

Juve-a pan hnuah season li a khelh chhungin Serie A nomawi a chawi vek a, Coppa Italia (1) leh Supercoppa Italiana (2) nomawi a chawi bawk - Juve chuan an club chhungkaw hrechiangtu hi kum 23 hnuai lam player rual enkawl turin an thlang ta a ni. 

Italy tan vawi 116 inlana goal 13 khungtu Pirlo hian kum 2006 khan World Cup nomawi a lo chawi tawh bawk a, a tawnhriat ringawt pawh hi U23 player tan chuan hlawkpui tham a ni ang.



Share this Post

Login to comment
No Comments