AC/DC fans-in Axl Rose duh lo Mi 7,000-in ticket kir an duh

A vanglaia khawvela zaithiam lar ber pawl ni mah se, AC/DC fans lam chuan Axl Rose hi an ngaina ve lo. May 16-a Belgium-a AC/DC concert turah an zaitupa ber Brian Johnson chu a inlan thei dawn lo a, a aiawh turin Guns N' Roses vocalist hlui Axl an sawm a; nimahsela Belgian AC/DC fans an lungawi lo a, mi 7,000 zetin an ticket kir leh an duh.

May 16 hian Werchter-a Festivalpark-ah AC/DC hi an inlan dawn a, an zaitupa ber Brian Johnson chu a hriatna lam a ṭhat loh avangina inlan thei dawn lo. Belgian newspaper De Standaard tarlan danin ticket lei tawh mi 7,000 zetin an ticket chu an refund a, AC/DC hminga Axl-a zai tur chu an en peih lo!

A beng a dik loh avangin Johnson hi concert-a inlan thei a ni lo a, "Doctor-te min rawn angin ka inenkawl chhunzawm zel phawt dawn a, tunah hian studio lamah chuan ka zai min phalsak a, chu chu chhunzawm zel ka duh. Tuna ka rilrua awm chu ka hriatna hloh tawh neih leh tuma inenkawl chiah hi a ni a, chumi hnuah chuan concert-ah pawh ka inlan leh theih ka beisei. Ka hmalam hun hi ka hre lo a; nimahsela beiseina sang tak ka nei a ni," a ti.

1980 aṭanga AC/DC ni tawh a ni a, tun hnaiah a beng a dik loh avangin thil a hre ṭha thei lo. Hei vang hian a ṭhiante chuan, 'a hmalam hun atan duhsakna an hlan' tih an hriatin fans tam tak chuan Brian hi chawl hlen tur angin an ngai hman a; nimahsela chawlh a la tum mai lo. Hetihlai hian amah thlaktu tura Axl an la lailawk chu a lawm lo hle niin an sawi a, amahin sawi chhuak lo mah se a ṭhian hnai tak pakhat chuan AC/DC-in Axl Rose an 'hawh' tur chu a pawmpui lo niin an sawi.

Axl Rose tia hriat lar tak zaithiam hi a hming dik tak chu William Bruce Rose a ni a, February 6, 1962 khan a piang, Zaithiama nih piah lama hla phuah thiam tak a nih tel avangin fans pawh a ngah hle - heng zingah hian AC/DC fans an tel lo a nih hmel!