London Derby a nih avangin a hmuna entu awm lo mah se inkhel boruak a sang leh dawn. Mikel Arteta leh Frank Lampard tan manager hna an thawh hnua an nomawi hmasa ber a nih theih ve ve avangin chak zawk nih an tum ruh dawn.
Player a nih laiin Lampard-a'n FA Cup nomawi vawi li a chawi a, zanina a hmachhawn tur Arteta hian vawi hnih a chawi thung. Manager an nih hnuah erawh eng nomawi mah an la chawi lo, inkhelh banah pakhat zawk chuan 'nomawi pakhat' tia sawi tur a nei dawn tihna a ni.
Europe ticket
Arsenal hian Premier League bikah chuan tun hnai kum 25 chhunga season an hman chhiat ber ṭum an tawng, pariatna an nih avangin European football an khel phak dawn lo. FA Cup champion an nih erawh chuan Europa League-ah an inlan ang.
Gunners manager Arteta chuan, "Arsenal hian thil engkim a ṭha ber zel a phu, eng inelna pawh ni se nomawi chawi turin theihtawp kan chhuah ang," a ti. Europe ticket neih nan champion an duh a, chutih rualin player lian chelh leh hip nan an duh zual bawk.
Spanish manager hian defender Shkodran Mustafi leh keeper Bernd Leno te chu hliam vangin a la chhawr thei dawn lo. Pierre-Emerick Aubameyang, Alexandre Lacazette leh Nicolas Pepe te inkawp hi champion pui tham an ni em tih fiah a ni dawn.
Lampard a ṭha
An tlarhnung a pui lo tih mai loh chu Chelsea inkhel a hmuhnawm a, manager Lampard-a'n fak a hlawh viau. Chutih rualin hna thawk ṭha ni tur chuan nomawi a pawimawh - Gunners a hneh a nih chuan English manager hian fak a hlawh zual ang.
Lampard-a'n Blues a enkawl tir lama a rin ngam loh Olivier Giroud a ring tawh. France international hian semifinal-a Manchester United an hneh ṭum pawhin goal a khung. Lampard chuan, "A phu ang ngeiin khelhna hmun a chang," tia a fak striker hian a club hlui a hmachhawn ngei a rinawm.
Goal keeper manto ber Kepa Arrizabalaga-a'n tih sual a ngah avangin manager rinna a hloh a, si ban nghak turin Willy Caballero a din zawk a rinawm. Hliam tenau nei Christian Pulisic leh N'Golo Kante an dam tawh a, winger Willian-a'n Blues jersey ha chunga a match hnuhnung ber a khel tura ngaih a ni bawk.
Arteta vs Lampard
Premier League manager ni lai zinga naupang ber Mikel Arteta chu vawiin hian kum 38 leh ni 128 a ni a, a khingpui tur Frank Lampard hi kum 42 leh ni 42 chiah a ni ve thung - tu emaw zawk chuan nomawi an chawi dawn.
Chelsea manager Lampard-a'n season tir aṭangin team a kaihruai a, season hmasa khan Championship lama tawnhriat a lo nei tawh bawk. Arteta erawhin season chanve vel chauh team a la kaihruai a, a hun hmasa lamah erawh Pep Guardiola kiangah a in tuai hriam thung.
January thla khan London club pahnih hi league-ah an intawng a, 2-2 in an inhnehtawk. An intawn aṭanga chhut pawhin thil tam tak a thleng leh tawh, zaninah chuan inhnehtawk a awm thei tawh dawn lo, chungnung zawk awm a ngai.
English manager Lampard-a'n Blues player ṭha ber Eden Hazard a chân bakah David Luiz a hralh a, player neih sa leh naupang zawk a chher chhuah hmangin EPL-ah palina dinhmun an luah - a hna thawh hi a ṭha thawkhat viaua ngaih theih a ni.
Arteta-a'n North London club tan beiseina siamsak mah se an duh ang a hmasawn nghal zawt zawt erawh an ni lo. Khelh dan phung erawh a nei a, ball chang tlem tak chungin Liverpool leh Manchester City an hneh thei; Blues hi an hneh leh a nih chuan team enkawl kawnga bul ṭanna season ṭha tak a ni ang.
Login to comment
No Comments