Leicester City - Mite duh loh kha ropuina ramah!

Kum 1884 a din Leicester City-in an club chanchina a vawi khat nan Premier League nomawi an chawi a, kum 132 chhunga an club chanchin ropui ber thlentu Leicester player tam zawk chu season ṭan a nih hma kha chuan khawvelin a hmelhriat lo. Hei mai a ni lo - heng player rual kaihruai tura an ruat chu a hna hnuhnung panga aṭanga ban tawk vek Italian manager Claudio Ranieri-a ni!

Mah se, club tam tak duh loh, players man tlawm rual leh vawi tam hnawl hlawh tawh manager-te chuan football khawvel barakhaihin Premier League nomawi an chawi miau si. Ranieri-a'n Premier League champion ni turin player hman ngun bik 14 a nei a, heng player-te man belhkhawm hi pound maktaduai 30 pawh a tling lo.

Leicester regular starting XI-te man belhkhawm zat chu pound maktaduai 22 a ni a, league table-a palina dinhmun luah mek Manchester City regular starting XI-te man belhkhawm zat pound maktaduai 281 nena an inthlauhna chu a let sawm ai pawhin a tam zawk! Chutiang taka player langsar lo leh man tlawmte chu khawi aṭanga lokal nge an nih a? Football khawvelah eng sulhnu nge an lo neih tawh? tih hi zawhna awm nghal chu a ni.

Kasper Schmeichel (goalkeeper)

Kum 29-a upa Denmark international hian Manchester City-ah a career bul a ṭan a, City tan a inlan hmain Darlington, Bury, Falkirk, Cardiff City leh Coventry City-ah te loan-in a chhuak. Kum 2007 khan City tan a match hmasa ber a khel a, league match hmasa pasariha a inlan hnuah loan-a chhuahtir a ni.

January, 2009 khan Manchester United legend Peter Schmeichel-a fapa hian khelhna tur club a neih loh avangin a agent chuan BBC sports correspondent Chris Bevan chu keeper mamawh eng club pawh hrilh turin a ngen hial!

Notts County tan a khelh hnuah Leeds United a zawm a, June 2011-a Leeds United-in Leicester dawrna pound maktaduai 1.25 an pawm khan Foxes tana khelh a châk loh avangin a lawm loh thu a sawi chhuak - tunah erawh a lawm tawh ang!

Danny Simpson (right-back)

Manchester United chher chhuah, kum 29-a upa defender hi ram tana khel tura koh pawh a la ni lo. United aṭang hian loan-in Royal Antwerp, Sunderland, Ipswich Town, Blackburn Rovers-te a pan a, Newcastle United leh QPR tana a khelh hnuah kum 2014 khan pound maktaduai 2-in Leicester a zawm.

Christian Fuchs (left-back)

Austria tana vawi 74 inlan tawh defender hian Wiener Neustadt, SV Mattersburg, VfL Bochum, FSV Mainz leh Schalke 04 tana a khelh hnuin nikum June khan free transfer-in Foxes a zawm.

Kum 30-a upa defender hi Foxes tana khel tura sawm thlutu chu khatih laia Leicester manager Nigel Pearson a ni. A hnu lawkah Pearson ban a ni a, amah la luttu manager hnuaia a training hman lo tur chu Fuchs hian hrilhhai thlak a tih thu a sawi a, tunah chuan Pearson ban a lo ni kha a lawm tawh zawkin a rinawm.

Wes Morgan (centre-back & captain)

Kum 32-a upa defender hian Notts County-ah bul ṭanin kum 2000 khan non-league club Dunkirk FC a zawm a, accountant nih tumin lehkha a zir pah bawk. Jamaica international hi Nottingham Forest chuan hmu fuhin an club tana khel turin an la lut a, Morgan-a man zatah hian football thawmhnaw set hnih an seng! Forest tan match 379 tehmeuh a khelh hnuah January, 2012 khan Foxes hian pound maktaduai 1-in an lei a, tunah chuan PFA team of the year-ah hial langin Premier League champion captain a ni ta!

Robert Huth (centre-back)

Germany tana vawi 19 inlan tawh defender hi Leicester squad-ah chuan tawnhriat nei ṭha ber pawl a ni. Chelsea tan a khelh laiin Pre­mier League-ah vawi hnih a champion tawh a, Middlesbrough leh Stoke City tan a khelh hnuah kum 2015 khan pound maktaduai 3-in Leicester hi loan-a a khelh hnuah a nghetin a zawm a, Stoke City Player of the Year kum 2011 khan a lo ni tawh bawk.

N'Golo Kante (midfielder)

Kum 25-a upa midfielder hi a career ṭan­tir lamah chuan a tet avangin club khelhna tur a nei mumal lo! A khelhna amateur club Suresnes president leh Ligue 2 club Boulogne hotute inhriat ṭhat zarah French club tan hian a professional career a ṭan a, kum 2013-ah Ligue 2 club Caen zawm lehin hlawhtlinna a chhar ṭan a, nikum khan pound maktaduai 5.6-a Leicester zawmin Foxes champion-na kawngah player ṭangkai a ni.

Danny Drinkwater (midfielder)

Manchester United chhuak Drinkwater hian Old Trafford-a a cham chhungin Huddersfield, Cardiff, Watford, Barnsley-ah te loan-in a khel a, United tan vawi khatmah a inlan lo. Kum 2012 khan Foxes hi £675,000-in a zawm a, kum 26-a upa midfielder hi a man phu tawk aia ṭhaa khel ṭhin niin England tan tun hnaiah koh a ni.

Marc Albrighton (winger)

Kum 26-a upa winger hian Aston Villa-ah a career bul ṭanin Villa Park-ah hmun a chan tam loh avangin Wigan Athletic-ah loan-in a khel a, kum 2014-a Villa-in an chhuah zalen hnuah a thlawnin Leicester City a zawm. Kum hnih a liam a, Championship lamah Albrighton duh lotu Villa an tla thla a, English winger hian Premier League champion nih a lawm thung.

Riyad Mahrez (winger)

Leicester City champion-na kawnga pla­yer pawimawh ber pawl tih ngam Algerian winger hian kum 2014 khan Foxes hi £400,000-in Ligue 2 club Le Havre aṭangin a zawm a, tun season Premier League-ah goal 17 khungin assist vawi 11 a nei.

French amateur club Quimper-ah bul ṭan­in Quimper tan a khelh lai hian Pogba unau­­pa Mathias Pogba nen an cheng dun
ṭhin a, Quimper a thlen tirha a bungraw neih chu toothbrush, toothpaste leh football boot chiah a ni.

Premier League-a a season hnihnaah PFA Player of the Year-ah thlan a ni a, African player zinga he chawimawina dawng thei hmasa ber niin Chelsea legend Didier Drogba leh Yaya Toure-te meuh pawhin an tih theih loh kha a ti thei tlat.

Shinji Okazaki (forward)

Japan tan vawi 100-a inlana goal 48 khung thei forward hian nikum nipui lai khan Leicester a zawm a, a man zat atana Foxes insen zat hi pound maktaduai 7-a ni. Premier League a pan hmain J League club Shimizu S-Pulse leh Bundesliga club pahnih VfB Stuttgart leh FSV Mainz tan a khel a, Bundesliga-ah goal 37 a khung hman.

Jamie Vardy (Forward)

Kum li liam taa non-league club tana la khel striker hi Leicester thawnthu ropui ziahna kawnga an player ṭangkai ber pawl a ni. Premier League-ah goal 22 khungin England tan vawi ruk inlanah goal hnih a khung tawh.

Kum 2012 khan Leicester City hi pound maktaduai 1-in a zawm a, non-league player zinga player man to ber a ni nghal. Leicester a zawm hma kum hian Fleetwood Town tan khelin season khatah goal 34 a khung. November thla khan Premier League match 11 chhung a zawnin goal a khung a, Premier League player zinga hetiang dinhmun luah thei hmasa ber a ni.

Jeffrey Schlupp (winger)

Kum 23-a upa Ghana international hi Leicester City youth system chhuak niin a
ṭul dan a zirin left-back ah pawh chhawr theih a ni. Kum 2013 khan Manchester United-ah kar thum chhung trial a lo nei tawh a, United tana khel tura ṭha tawk loa an ngaih winger hian tunah chuan Premier League champion medal a awrh dawn ta.

Leonardo Ulloa (Forward)

Kum 29-a upa Argentine striker hi nikuma Leicester himna atana a ṭangkai tluk zetin Premier League champion an nihna kawngah pawh player ṭangkai a ni a, mamawh hun taka rah ṭhin striker a ni.

C.A.I., San Lorenzo, Arsenal Sarandí, Olimpo, Castellon leh Almeria tan a khelh hnuah Championship club Brighton zawmin vawi 58 inlana goal 26 a khung hnuah Leicester hi kum 2014 khan pound maktaduai 8-in a zawm a, a hunlaia club record a ni.

A pi leh pu avangin Chile tan khel thei mah se Argentina tan pawha la inlan lo striker hian Chile sawmna a hnawl.

Andy King (midfielder)

Wales international hi Leicester City youth system chhuak niin football a khelh
ṭan aṭangin club dang tan a la khel ngai lo. Kum 2007-a a professional match hmasa ber kheltu hian Premier League-a Leicester a champion pui hma hian League One leh Championship-ah te Foxes hi nomawi a lo chawipui tawh.