Swiss champion Basel

Basel chuan Swiss Super League-ah team ṭha ber an nih zia an pho-lang leh ta. Kartawp inkhelah Matias Delgado leh Birkir Bjarnason te goal khung hmangin Sion chu 2-1 in an hneh a, a zawna a vawi sarih nan Swiss title an chawi.

Swiss Super League-ah Basel hian nikum November aṭang khan hneh loh an tawng tawh lo a, kartawp inkhelah khan table-a pahnihna Young Boys chuan Grasshoppers lakah 2-1 thoin hnehna lo chang ve mah se an inthlauhna chu point 16 lai a nih tawh avangin match nga khelh hmabak la awm aṭangin Basel hi umphak theih an ni tawh lo.

Bael hian a zawna vawi sarih league title la tur hian coach panga an nei hman a, season ṭan dawn khan Urs Fischer chuan Paulo Sousa thlakin a season khat enkawlnaah a champion pui nghal a ni.

Grasshoppers chu Swiss league chanchina hnuhma nei ṭha ber an la ni cheu a, vawi 27 league title la tawhin Basel hian an dawt a, vawi 19 an champion ve tawh thung. Swiss Super League-ah hian team 10 an awm a, team tin te hi match li
ṭheuh an inkhel kual ṭin.

Basel hian nikum kumtawp lam khan Swiss Cup quarterfinal-ah Sion chu penalty-a hneh loin an lo tla tawh a, UEFA Europa League last 16-ah pawh champion lai Sevilla hneh loin an tla tawh bawk. Season tharah chuan Champions League an khel ang.