MFA Cup-ah Lawngtlai hun a inher chhuak dawn em?

MFA Cup vawi 22-na final chu vawiin tlai dar 2:00 hian Aizawl DFA First Division champion FC Bethlehem leh inelna thlengtu Lawngtlai club MLS FC ten an khel dawn. MFA Cup-ah Lawngtlai club an la champion ngai lo a, Lawngtlai fa chuam Vanlalpeka leh a hoten mellung thar phum an tum ang.

MLS FC hi group A-ah pahnihna ni mah se semifinal-ah group A pakhatna Lunglei club Venglai FC chu extra time-ah 3-2 in an hneh. Venglai FC hi group stage-ah FC Bethlehem hneh loh an ni. Chutihrualin FCB hi group B pahnihna ni mah se semifinal-ah Model United 3-2 in an hneh. Group stage-ah MLS leh Model United hi 2-2 in an inhnehtawk thung.

Peka hun?

Lawngtlai football chanchinah Vanlalpeka'n hmun pawimawh a chang. Mizoramin kum 2003-a National Under 16 Football Championship, Lammuala an champion ṭum khan Peka hi striker a ni a, Subroto Cup U17-ah Mizoram champion pui bawkin 'bike' a dawng hial. Tunah chuan Lawngtlai Peka tia hriat lar ṭhin kha Coach a ni tawh a, hming a chher zel.

Peka hian Mizoram mipa team hi vawi thum a hruai tawh a; Under 13, Under 17 leh Under 23-ah an champion pui vek. Mizoram mipa team enkawl ṭumah hneh loh a tawng lo. Chutihrualin hmeichhe team a enkawl ṭumah bronze medal a lakpui thung.

Lawngtlai tan Peka hian sulhnu ṭha tak a hnutchhiah a, nikum khan Inter Dist U17 Football Tournament-ah a vawi khat nan a champion pui a, inelna hi Kolasib-ah neih niin an vawi khat final thlennaah an champion. PYKKA 2010-ah Lawngtlai chu a vawi khat nan Under 17-ah a champion pui a, Mizoram pum huap U17 inelna hrim hrima an champion hmasa ber a ni.

PYKKA 2010-a an champion lai hian Peka hian coaching certificate a la nei lo a, tunah erawh AFC C Licence bakah NIS leh KNVB World Coaches certificate a nei tawh bawk.

Hriatpuia hi...

FC Bethlehem enkawltu Lalhriatpuia Sailo hi tualchhung football hrechiangtu tia sawi theih a ni bawk. A hun hmasa lamah Hriatpuia hi referee lamah a kal a, tun hnai khan AIFF hnuaia referee instructor-ah a inziak tling. Chutihrualin coaching lam pawh a kalpui reng a, MPL9-ah khan FC Bethlehem assistant coach-ah a ṭang.

MPL-a an tlak hnuin First Division-ah FC Bethlehem hi a champion pui hial a, MPL Playoff khel thei dinhmuna a dinpui leh bakah MFA Cup khel turin a tlinpui bawk. Hriatpuia hian Reliance Naupang League-ah Dawrpui Vengthar a enkawl bawk a, tualchhung football tan a thawh hlawk hle.

Joseph Vs Mahmingtea

Semifinal-a FC Bethlehem chakna goal khungtu Joseph Lalṭhafela hi tun hnaia tualchhung football-a hming langsar ber a ni. MPL la khel lo mah se Joseph hian First Division-ah kum zawnin Sihphir Venghlun leh FC Bethlehem a champion pui ve ve a, best player a ni ve ve bawk.

Hetah hian Joseph-a record hi a la tawp lo. LPS Cup neih zawh takah khan Sihphir Venghlun a champion pui a, best player a ni leh bawk. MFA Cup-ah pawh hian FC Bethlehem a champion pui chuan best player ni thei dinhmunah a ding. Chutihrualin football hi chu team game a ni a, champion tur chuan Kiran Chhetri, Lalrinhlua, RH Laltlanhlua leh player dangten an hna a thawh ve a ṭul ang.

FCB lamah midfielder Joseph-a a langsar a, Lawngtlai lam tan Richard Rohmingliana a langsar thung. First Division-ah Mahmingtea hi Kanan FC tan a khel a, First Division-ah FC Bethlehem penalty shootout-ah an hneh lo - Lawngtlai kawr hain phuba lakna remchang a nei ang.

Mahmingtea hian goal kua a khung tawh a, goal satliah a khung rualin goal pawimawh a khung tel. Hmar Veng leh FC Serchhip an hneh ṭumin goal hmahruai a khung ve ve a, Model United leh Saidan lakah goal hnih ve ve khungin 2-2 ve vein an inhnehtawk. Semifinal-ah Mahmingtea'n si phurh sutna goal a khung a, Venglai FC lakah chak nemghehna goal a khung bawk.

Chutihrualin tun inelnaa Lawngtlai hmachhuan ber chu an fitness ṭhat hi a ni a, entu ṭhahnem takin an ṭawiawm bawk avangin FC Bethlehem aiin nomawi chawi turin an buk a rit zawk.