Bayern-a kum nga dang cham tur Neuer

Bayern Munich goal-keeper Manuel Neuer chuan Allianz Arena-ah a rinawmna nemnghetin kum nga dang cham turin contract thar a ziak a, Ger-man club tan hian kum 2021 thleng a khel ang.

FIFA World Cup 2014-a Germany champion puitu keeper chuan, "Ka la in fit ṭha a, ka la inzo hle. Ka hriselna dinhmun ngaihtuah ka ngai tih ka hria a, mah se kum 30 leka career tawp hun tur ngaihtuah chu ka tih loh zawng a ni. Nitina football khelh hi nuam ka ti a, rim taka hnathawhte, training neihte hi a hlimawm a, he game hi ka hmangaihin chona thar hmachhawn reng hi nuam ka ti a ni," tiin Bayern-a a contract zawh huna kum 35 tling tawh tur keeper chuan a sawi.

Neuer chuan sawi chhunzawmin, "Bayern-ah hian ka hlimin nuam ka ti a, contract thar ka ziak thei hi ka lawm hle a ni. Tun season-ah nomawi pathum chawi ngei kan tum a, chu chu tun atana kan ruahmanna a ni. Kum lokal zel turah pawh champion nomawi tam zawk kan chawi zel ka beisei," a ti.

German club hi season tharah manager Pep Guardiola chuan Manchester City lamah a kalsan dawn a, City keeper Joe Hart laka rilru hmin zan lo nia an sawi Spanish manager hian Neuer hi hruai a tum anga sawi thawm ri ring hman viau mah se Allianz Arena-ah a rinawmna a lantir ta zawk.

FIFA FIFPro World XI-a ṭum thum lai lang thei keeper hi kum 2011 khan Bayern Munich hian khawvela goalkeeper man to pahnihna ni turin Schalke 04 aṭangin pound maktaduai 19-in an lei a, man to lama keeper zinga a tluk loh awmchhun chu kum 2001-a pound maktaduai 33-a Parma aṭanga Juventus pantu Gianluigi Buffon chiah a ni.

Germany tana vawi 64 inlan tawh Neuer hian Bayern a zawm hnuah Bundesliga (3), German Cup (2) leh Champions League (1) nomawi a chawi tawh a, tun season-ah inelna hrang pathuma champion thei dinhmunah an ding mek bawk.

Bayern Munich hian an Spanish manager chelh zo lo mah se tun hnaiah an player pawimawh Jerome Boateng, Thomas Muller, David Alaba leh Javi Martinez-te chuan kum 2021 thleng Allianz Arena-a cham chhunzawm turin contract thar an lo ziak tawh a, season tharah chuan Chelsea leh Real Madrid boss hlui Carlo Ancelotti kaihhruaina hnuaiah an khel ang.