Celtic manager Deila a bâng dawn

Scottish club lian Celtic manager Ronny Deila chuan season tawp rualin Scottish Premier League hmahruaitu club hi a chhuahsan tur thu a puang a, club chuan Deila chu ama duhthlanna ngeia chhuak tur a nih thu an sawi.

Celtic hian karhmasa Pathianni khan an hmelma kumhlun leh season thara SPL khel tura inpetkai Rangers chu Scottish Cup semifinal-ah an hneh lo a, penalty-a Rangers an hneh lohna inkhel hi manager Deila banchhanah hian ngaih a ni.

Season hmasaa Premiership leh League Cup-a Celtic champion puitu manager chuan, "Kan beisei ang leh duhdan ang kan phak loh chang a awm ṭhin a, chu chu huaisen taka ka pawm a ngai a ni," tiin tun season-ah a beisei anga an khelh loh thu a sawi.

Kum 40-a upa manager hian tun season-ah Celtic hi Champions League group stage-a hruai thleng zo lo a, Europa League-ah group mawngphaha awm chungin hnawhchhuah an ni bawk.