City nena inhnehtawk Magpies beiseina a chuai lo
Thawhlehni zan khan Newcastle United-in Premier League mangṭha mai an la tum bik lo tih khelmual chhungah an lantir a, an mikhual Manchester City nen 1-1 in an inhnehtawk.
St James' Park-a inkhelah hian Manchester City-in Sergio Aguero goal sawisel hlawh tak hmangin hma hruai mah se Magpies-in Vurnon Anita hmangin an si phurh an sut a, point khat ve veah team pahnih an lungawi a ṭul.
Goal sawisel hlawh
Inkhel ṭan aṭanga minute 14-na lekah City-in Aguero hmangin goal hmahruai an khung a, Aleksandar Kolarov free-kick pet aṭanga goal khung turin Argentine striker hi off-side mah se referee in a ham miau lo a, Magpies an vanduai.
Sergio Aguero-a'n Premier League-a match 147 a inlanah goal 100 a khung tling ta a, Premier League-a goal 100 khung tling turin Alan Shearer (124) tih lohah chuan match mamawh tlem ber a ni - South American player zinga Premier League-a goal 100 khung tling hmasa ber a ni bawk.
Match 53 teh meuh Premier League-a goal a khung loh hnuah Vurnon Anita-a'n Magpies tan an si phurh sutna goal a khung a, City-in Jesus Navas leh Kevin de Bruyne hmangin hun ṭha neih chhunzawm mah se Magpies keeper Karl Darlow-a ṭang tlat a, City-in goal dang an khung thei lo.
Newcastle-in hun tawp hnaih lamah Georginio Wijnaldum hmangin si phurh sutna hun ṭha an neih chhunzawm a, Magpies keeper chet ṭhat zanah City keeper Joe Hart-a'n chet ṭhat loh a duh bik lo a, rilru huaisen Newcastle a ti beidawng.
Magpies an harh tlai?
Newcastle United legend Alan Shearer-a'n a club hlui chuan Rafael Benitez an ruai tlai hret nia a hriat thu a sawi a, Spanish manager chuan St. James Park pan hma se chuan Newcastle chu tlak hlauhthawnawmah an awm a rin loh thu a sawi.
Shearer-a thusawi hian dikna chen a nei. Magpies player hluiten Steve McClaren-a hnuaia huaisenna leh beih hram hramna an neih loh kha Liverpool manager hnuaiah an chhar let a, an huaisenna avangin City lakah point khat hlu tak an hlawh chhuak - an dinhmun erawh a la him lo.
Real Madrid boss hlui hian a player-te hrechiang turin hun a nei tam tawk lo, Thawhlehni zanah erawh huaisen takin player langsar Aleksandar Mitrovic, Georginio Wijnaldum leh Jonjo Shelvey-te bench-ah a dah a, a tisual lo tih khelmualah hmuh theihin a lang.
Andros Townsend a thawkrim takzet a, English winger hi second half-a Wijnaldum-a'n a thlak ṭumin fan-te'n doing chungin an zahna an lantir hial. Magpies tan Centre-back Jamaal Lascelles-a thawhrimna hmuh hmaih theih a ni lo bawk.
Newcastle-in an hmabakah Liverpool, Crystal Palace, Aston Villa leh Tottenham-te an la hmachhawn dawn a, Premier League khel zel turin an hmabak a la hautak hle.
Champions Leaague leh City
Manchester City-in hnehna an chan zawh loh avangin season thara Champions League khelh tumte tan zau takin kawngka an hawng leh ta a, Manchester United leh Liverpool-te tan season thara Champions League khelh beiseina an chhit nun sak leh ta.
City hian April 26 zanah Champions League semifinal first leg khel turin Real Madrid an mikhual dawn a, season thara Champions League khel tura tun season Champions League nomawi chawiah an lo innghat lawk a nih chuan an tisual ang - an tum tur hi Real Madrid an ni tlat.
Manchester khaw club hian chak result hlawh chhuak zo lo mah se lawmna tur dang an nei a, centre-back Vincent Kompany chu hliam vanga match ruk a khelh theih loh hnuah a inlan leh tawh a, winger Raheem Sterling chu hliam vanga match nga a chawlh hnuah second half-ah khelmual chhungah a tlan lut bawk.
Beiseina nen Benitez
Newcastle manager Rafael Benitez chuan, "Ka player-te khelh danah fan-te pawh an lawm a, Premier League khelh zel tumin kan zavai khan kan theihna zawng zawng kan pe a, beiseina nen kan match khelh leh turah hnehna kan chan ka beisei," tiin beidawng thei an la nih loh thu a sawi.
Inrinni zana Liverpool khelmuala lenglut tur Kop-te ngainat rawn Benitez chuan, "Khawiah nge kan inkhelh dawn tih hi a pawimawh lo a, kan match hmabak apiangah chak zel kan tum ang. Liverpool nena kan inzawmna hi a ṭha hle tih phat rual a ni lo a, mah se tuna ka duh ber chu anni hi Europa League-ah ṭha takin khel se la, Premier League-ah chuan keini hian point thum hlawh chhuak ila tih hi a ni," tiin a club hlui nena an inhmachhawn tur a thlir lawk.
Manchester City boss Manuel Pellegrini chuan, "Kan result-ah lawm mai tur ka ni. Hnehna chang thei dinhmuna kan din hnuah game thunun zo lo mah ila hetiang game khelh hi chu a harsa ṭhin. Chelsea laka kan khelh dan ang khan kan khel lo a, ni thum hnua match dang khelh lehnghal chuan ka naute tan pawh chauh hi a awm ve reng a ni," tiin a player-te khelh dan a sawisel duh lo.
Team Dinhmun
Team Pld W D L GF GA GD Pts
Leicester City 34 21 10 3 59 33 26 73
Tottenham Hotspur 34 19 11 4 64 25 39 68
Manchester City 34 18 7 9 62 34 28 61
Arsenal 33 17 9 7 56 34 22 60
Manchester United 33 16 8 9 40 30 10 56
West Ham United 33 13 14 6 54 42 12 53
Southampton 34 14 9 11 45 35 10 51
Liverpool 32 14 9 9 52 43 9 51
Stoke City 34 13 8 13 37 47 -10 47
Chelsea 33 11 11 11 49 45 4 44
Everton 33 9 14 10 53 44 9 41
Watford 33 11 8 14 32 37 -5 41
AFC Bournemouth 34 11 8 15 41 57 -16 41
West Brom 33 10 10 13 31 40 -9 40
Swansea City 34 10 10 14 34 45 -11 40
Crystal Palace 34 10 9 15 36 43 -7 39
Norwich City 34 8 7 19 35 60 -25 31
Sunderland 33 7 9 17 39 57 -18 30
Newcastle United 34 7 8 19 36 62 -26 29
Aston Villa 34 3 7 24 23 65 -42 16