FIFA Ranking - India a tlahniam, hmabak a ko

Football khawvela ram ṭha tehna, FIFA ranking chhuak thar berah India chu 121-na an ni a, hmun li ngawtin Blue Tigers hi an tlahniam tihna a ni a, Igor Stimac-a kaihhruaina hnuaiah India tan khua a var thei lo.

December 21, 2023-a ranking tihchhuah khan India hi 102-na an ni a, mahse, March, 2024 a herchhuah meuh chuan Blue Tigers hi 12-na an ni der - kum 2017 khan 132-na vela awm lai an nei hman a, hemi hnua India dinhmun a chhiat leh ber ṭum a ni.

India hnuai chiahah hian Zimbabwe an awm a, anni hi 122-na niin, hmun hnihin hma an sawn thung a, Blue Tigers chung chiahah hmun nga ngawta tlahniam Lebanon an awm - a pumpuiah Argentina chu pakhatna an la ni a, England chu pathumna aṭangin palinaah tlain, Belgium chu palina aṭangin pathumnaah an chho thung.

A chhan

Kum 2023-ah khan India hian top 100 hial lutin, 99-na dinhmun an luah hman. Mahse, kum 2024 a thlen meuh chuan Blue Tigers an chak hleithei lo a, 121-naah hial an tla ta - All India Football Federation tan zahna tham a ni.

India hian kuminah match nga an khel tawh a, heng match-ah hian chak vawi khat mah an nei lo! Asian Cup-ah Australia (2-0), Uzbekistan (3-0) leh Syria (1-0) awmpuiin, an tlawm fai vek a, an khingpuite ngaihtuahin a la ngaihdam theih viau.

Mahse, March international break-ah World Cup 2026 qualifier match hnih khelin, Afghanistan ve ve an hmachhawn a, vawi khat an in draw a, vawi khat an tlawm thung - hei zet erawh ngaihdam a harsa tawh! Afghanistan hi ranking-ah 151-na an ni a, hmun sarihin hma an sawn.

A lang ta

Afghanistan laka tlawm avangin Indian football fans tam tak an lungawi lo a, Guwahati-a Afghan ho an hneh loh ṭumin fans tam tak chuan coach Igor Stimac chu bang mai turin an au a, mahse, Croatian coach hian ban a tum tlat lo.

Stimac hian thla khatah cheng nuai 25 a hlawh mek a, tam tak a ni. June 2026 thleng India enkawl tur hian contract a nei a, AIFF thuneitu lam pawhin ban duh tawh mah se, an ban avanga zângnadawmna an sen tur zat ngaihtuahin an ban ngam lo.

Croatian coach hi AIFF hian ban ta se, an ban avangin vaibelchhe ruk chuang an pek a ngai dawn a, Stimac ban man a to dawn - hei vang hian AIFF tan huai taka hma lak a harsa.

Sorkar a ngawi thei lo

Tun hnaia India result avangin sorkar ber pawhin ngawih harsa a ti a, Sports Authority of India (SAI) chuan AIFF president Kalyan Chaubey leh a thawhpuite chu, coach hlawha sum tam tak seng chunga an beisei ang result an neih theih loh chungchang sawipuiah an sawm hial.

SAI lam chuan AIFF chu an hmachhawp leh ruahmanna te sorkar hnena hriattir turin an ti a, SAI hian coach ban thei lo mah se, AIFF-in sorkar sum tam tak a hman avangin AIFF chungah erawh thu an nei thuk hle - kum khatah SAI hian vaibelchhe 50 dawn AIFF tan a chhawpsak ṭhin.

Sorkar thuneitu pakhat, a hming tarlan loh chuan, "Sorkarin sum tam tak a seng a, kan duh ang result min pek loh chuan coach chauh ni loin, federation hruaitu pawhin mawh an phur tel. AIFF hian an hmachhawpte chiang zawka an rawn chhawp a ngai ang," a ti.

Bang dawn lo!

AIFF president Kalyan Chaubey chuan tun hnai khan, Stimac kawm tur committee a din a, Thawhlehni khan online-in Croatian coach hi titipuina an nei.

Meeting-ah hian AIFF Finance Committee chairman leh executive member Menla Ethenpa, Competitions Committee chairman leh executive member Anilkumar Prabhakaran, AIFF acting secretary general M Satyanarayan te an tel.

Hetihlai hian member dang pathum AIFF vice president NA Haris, IM Vijayan leh Climax Lawrence te erawh an tel thei lo. AIFF chuan June 6 (Kuwait) leh June 11 (Qatar) a World Cup qualifier khelh tur atana rilru pe turin Stimac hi an ti a, an la ban dawn lo, tihna a ni.

Stimac-a thusawi

India-in FIFA World Cup qualifiers 2026 third round an luh loh chuan a hna aṭanga a ban tur thu Stimac hian a lo sawi tawh a, hemi chungchang AIFF hruaituten an zawhna chhangin, "Kum kal taah khan round three lut tura kan beih a ṭul thu hi ka sawi.

"Group khat aṭangin team pahnihin third round hi an lut dawn a, kan group-ah pahnihna kan ni mek. Kuwait nena June 6-a kan inhmachhawn zawhah kan sawi leh thei ang," a ti a, India hi tlangpui theih a inbeisei.

Stimac chuan sawizawmin, "Kuwait nena kan inhmachhawn tur hi Indian football-a game pawimawh ber pawl a ni hial ang. Kan chak chuan a vawi khat nan World Cup qualifier-a third round lut turin kan chance a ṭha dawn a, staff leh player te pawhin a pawimawhzia an hrechiang a, chak ngei turin theihtawp kan chhuah ang," a ti a, result ṭha a beisei zel.