Manchester United manager Ole Gunnar Solskjaer chuan forward Angel Gomes chu chhuak thei dinhmuna a din thu a sawi. English forward hi June 30 zawhah a contract a tawp dawn a, United nen hian contract pawtsei turin indawr chho mek mah se inremna an hmuh a rinawm ta lo.

Kar liam ta khan Solskjaer chuan inremna an neih ngei a rin thu sawi mah se nimin tlai press conference-ah thil awm dan a danglam thu a sawi. Norwegian manager chuan, "Thu thar a awm lo. Kan beisei ang a thlen a rinawm lo. Nizan leh tukin thleng khan thu thar ka hre lo a, tun thlenga thu thar a awm loh reng chuan a chhuah mai a rinawm," tiin nimin tlai khan Gomes-a chanchin a sawi.

Gomes hi August 31, 2000 khan Edmonton, England-ah piang a, kum ruk mi a nih aṭangin United academy-ah a inzir ṭan. Kum 13 mi a nihin Under 17 inelnaah a tel tawh a, kum 14 a nihin Under 18 inelnaah bench-ah vawi hnih a ṭhu pha bawk. 

July 2015 khan Mizo naupangte pawhin an khelh ve tawh Manchester United Premier Cup-ah United tan a captain a, an team hi 12-na daih ni mah se Most Valuable Player atan an thlang. 

Kum 19 mi Gomes hi 5ft 3in chauha sang ni mah se a chet ran leh a thiam avangin academy a awm lai aṭangin hming a chher tawh a, May 2017 khan Jimmy Murphy Player of the Year dawng turin an thlang. May 21, 2017 khan Crystal Palace nen an inkhelh ṭumin Wayne Roone a thlak a, kum 16 leh ni 263 mi niin Duncan Edwards hnua United tana khel naupang thei ber a ni a, kum 2000 a piang chin Premier League-a inlan hmasa ber a ni bawk.

England-in India rama FIFA World Cup Under 17 an champion khan Angel Gomes hian jersey number 10 hain captain a ni a, chutihrualin theihna sang tak nei mah se United tlarhma enin Gomes tan hmun a awmin a lang lo a, a khelh phakna tur zawngin United a chhuahsan a rinawm ta hle.

---

Share this Post