Setien chungah Barca players lawm lo?

Spanish La Liga-a beisei ang result an neih theih loh hnuah Barcelona player-ten coach Quique Setien chungah an lungawi lohna an lantir a, coach hi ban an duh niin Spanish media-te chuan an tarlang leh der tawh. 

Barcelona player langsar zingah Luis Suarez chuan Spanish coach hi hriatthiam theih tak turin Celta Vigo nen an inhnehtawk hnuah a sawisel a, an result chu coach mawhphurhna a nih thu a sawi lang zauh!

Hetiang boruak karah hian Barcelona chuan an coach hi tun season zawh ruala ban an tum nia sawi a awm bawk - Setien hian January khan kum hnih leh a chanve chhung atan Barca hi a zawm ve chauh a, tuna thil kal dan en chuan a cham a rinawm ta lo hle. 

Mahse, Spanish coach hian La Liga emaw Champions League nomawi a chawi thei a nih chuan Nou Camp-ah cham theihna chance a nei a, Real Madrid-in an lehpel tawh avangin a bik takin La Liga nomawi chawi hi a harsa lehzual dawn. 

Spanish media ṭhenkhat chuan Barcelona legend leh Qatari club Al Sadd enkawltu Xavi hming an sawi ri leh der tawh a, Barca B team boss ni lai Xavi Garcia hming pawh ri ring zingah a tel. 

Setien duh lotu langsar zingah Lionel Messi leh Gerard Pique an tel avangin Spanish coach dinhmun hi thup mawi chi a ni tawh lo a, a hna humhim turin zanin dar 1:30-a Atletico Madrid a hneh a ṭul ang. 

Barcelona hian Atletico hi an hneh zo lo leh ngat a nih chuan nomawi mangṭha mai chu thil finthlak a niin a rinawm a, Diego Simeone-a naute hian Champions League khelh an tum avangin tlawm an duh dawn lo. 

Setien hian tlarhmaa Messi leh Suarez kawppui turin Ansu Fati, Martin Braithwaite leh Antoine Greizmann zingah duhthlanna fel tak a la siam lo a, zaninah erawh huaisen taka thutlukna siam a hun tawh. 

Hetihlai hian Atletico tana player pawimawh midfielder Koke leh defender Stefan Savic-te chu hrem vangin an inlan thei dawn lo a, Setien-a tan chuan hei lo liama rimawi a awm chuang lo. 

Barcelona lamah Sergio Busquets chuan hremna a tawrh zawh tawh avangin midfield-a awi nung leh thei tawh dawn a, Sergi Roberto chu a hliam a dam tawh bawk. 



Share this Post

Login to comment
No Comments