Coronavirus vangin May thla khan French Open a khelh theih loh a, clay court inelna lian hi September thla chawhnu lamah an khel dawn. US Open chu an ruahman sa angin August 31 aṭanga khel ṭanin September chawhma lamah an zo ang.
Grand Slam khelh hmabak pahnihah hian Nadal chu nomawi kawltu a ni a, inelna buatsaihtu lam chuan champion lai hi inlan thei ngei se an duh ang tih chu a chiang - Nadal pawhin beiseina a nei.
Toni Nadal chuan, "Rafa nen kan inbe tawh a, a nihna takah chuan eng tournament ber nge khelh tur tih pawh a hrethiam lo hle. Duhthusamah chuan a pahniha khelh a ni, a pahniha khel tur erawh chuan a awlsam dawn lo," tiin a sawi.
US Open hnu lawkah hian Madrid leh Rome Open khelh chhunzawm tur a awm dawn, inelna pahnih hi clay court-a khelh tur a ni ang. Hmun hla takah boruak awm dan inang lo leh court hran hlakah inhnaih taka inkhelh a ngai dawn.
Andy Murray pawhin tournament inhnaihchilh lutuk chu a him tawk lo niin a sawi. Britain tlangval chuan, "US Open-ah quarterfinal chin thleng ta ila, a chawlhkar lehpek lawkah Madrid lama inkhel tura kal leh nghal chu a harsa ang.
"New York khawpuia semifinal leh final khel phak chin tan phei chuan tournament hmachhawn chhunzawm nghal chu thil tih chi a nih hmel loh," tiin a lo sawi ve tawh bawk.
Login to comment
No Comments