CYMA leh kohhran ṭhalai hruaitute inkawm

Central Young Mizo Association (CYMA) buatsaihin nimin khan CYMA hruaitute leh Mizorama kohhran hrang hrang ṭhalai hruaituten inkawm khawmna an nei a, Mizorama ruihhlo hluar zel tur do ho dan tur chungchang an sawiho.

CYMA committee room-a inkawmhona hi CYMA president Lalhmachhuana'n a kaihruai a, "Ruihhlo ti mekte chhanchhuah kawngah mai ni lo, a la ti ve lote venhim kawngah ṭan kan lâk a ṭul," a ti a, kohhran ṭhalaite thawhpuiah a sawm.

Lalhmachhuana chuan, "Theihtawp chhuahin hma kan la reng a, tun ang renga kan kal chuan kan ram dinhmun hi a ngaihtuahawm lutuk. Kan ram hmabak hi a êng lo a, engemaw chu kan tih a ngai, " a ti.

Inkawm khawmah hian kohhran hrang hrang aiawh ṭhalai hruaituten ruihhlo do kawnga an hmalakna report pein, hmalak zel dan tura tul leh ṭhaa an hriat, an ngaihdante an sawi a, "CYMA leh kohhran hrang hrangten ruihhlo do ho tura hmalak ni se," an ti a, kohhran hrang hrang telna tur, ruihhlo do pawl co-ordination committee din an rel.

CYMA gen. secretary Prof. Malsawmliana'n CYMA-in ruihhlo do kawnga hma an lakna hrang hrangte a tarlang bawk.

CYMA GS tarlan danin, December 11, 2023 aṭanga chhûtin CYMA Kumpuan Sub Committee-in ruihhlo kaihhnawiha mi an man zat chu 545 niin, heroin hawng 278.5, tictac bur 469, codein bur 324, alprazolam mum 88, tumispas (anti spasmodic) mum 570, clonazepam mum 6 leh kuhva ro bag 65 an man tawh.